சென்னை: சென்னையில் விருகம்பாக்கம் பகுதியில் தடை செய்யப்பட்ட மெத்தம்பெட்டமைன் போதைப்பொருள் பதுக்கி வைத்து பயன்படுத்தப்படுவதாகப் போதைப்பொருள் நுண்ணறிவுத் தடுப்புப் பிரிவு போலீஸாருக்கு நேற்று முன் தினம் ரகசியத் தகவல் கிடைத்தது.
இதையடுத்து, விருகம்பாக்கம் மற்றும் சாலிகிராமம் பகுதிகளில் போலீஸார் தீவிர கண்காணிப்பில் ஈடுபட்டனர். அப்போது, சாலிகிராமம் தனலட்சுமி காலனியில் மெத்தம்பெட்டமைன் போதைப் பொருளுடன் நின்றிருந்த கவுஷிக் என்பவரைப் போலீஸார் பிடித்தனர்.
அவரிடமிருந்து 3 கிராம் மெத்தம்பெட்டமைன் பறிமுதல் செய்யப்பட்டது. தொடர்ந்து, கவுஷிக் அளித்த தகவலின்பேரில் அபினேஷ், சந்திரசேகர் ஆகிய இருவரையும் பிடித்த போலீஸார், அவர்களிடமிருந்து மேலும் 4 கிராம் மெத்தம்பெட்டமைனைப் பறிமுதல் செய்தனர்.
போலீஸார் நடத்திய விசாரணையில், பிடிபட்டவர்கள் ஈக்காட்டுத்தாங்கலைச் சேர்ந்த கவுஷிக் (31), சாலிகிராமத்தைச் சேர்ந்த அபினேஷ் (33), புரசைவாக்கத்தைச் சேர்ந்த சந்திரசேகர் (29) என்பது தெரியவந்தது.
இவர்களில் கவுஷிக், சினிமா தயாரிப்பு நிறுவனம் ஒன்றில் மேலாளராகப் பணியாற்றி வருவதும், அவரது தந்தை தொலைக்காட்சித் தொடர்களில் துணை நடிகராக நடித்து வருவதும் விசாரணையில் தெரியவந்துள்ளது.
மேலும், சந்திரசேகர், ஓஎம்ஆர் பகுதியில் உள்ள தகவல் தொழில்நுட்ப நிறுவனத்தில் பணியாற்றி வருவதும், அவரது தந்தை எழும்பூரில் உள்ள கல்லூரியில் பேராசிரியராகப் பணியாற்றி வந்ததும், அபினேஷ் மீது ஏற்கெனவே வழக்குகள் இருப்பதும் போலீஸார் விசாரணையில் தெரியவந்துள்ளது.
இதையடுத்து, போதைப்பொருள் தடுப்புச் சட்டத்தின்கீழ் வழக்குப்பதிவு செய்த போலீஸார், மூவரையும் கைது செய்து விசாரணை நடத்தி வருகின்றனர்.
அவர்களுக்கு மெத்தம்பெட்டமைன் போதைப்பொருள் எங்கிருந்து கிடைத்தது, இதன் பின்னணியில் போதைப்பொருள் கடத்தல் கும்பல்கள் செயல்படுகின்றனவா, வேறு யாருக்காவது தொடர்பு உள்ளதா என்பது குறித்து போலீஸார் தீவிரமாக விசாரித்து வருகின்றனர்.