கவின்பிரசாந்த், கீர்த்திவாசன், பார்த்திபன்
ஆவடி: சமூக வலைதளம் ஒன்றில் கடந்த 2-ம் தேதி வர்த்தக நிறுவனம் மற்றும் வலைதளம் ஒன்றின் மூலம் ஆன்லைன் வர்த்தகம் செய்து லட்சக்கணக்கில் லாபம் ஈட்டியதாகக் காட்டும் காணொலி வெளியானது.
இது தொடர்பாக, ஆவடி காவல் ஆணையர் செந்தில்குமார் உத்தரவின் பேரில், ஆவடி, இணைய வழி குற்றப்பிரிவு போலீஸார் வழக்குப் பதிவு செய்து விசாரணை மேற்கொண்டனர்.
அவ்விசாரணையில் தெரியவந்ததாவது: திருவேற்காட்டைச் சேர்ந்த கவின்பிரசாந்த் (24), கீர்த்திவாசன் (24), பார்த்திபன் (24) ஆகிய 3 பேர், பள்ளி, கல்லூரி படிப்புகளை ஒன்றாக படித்து நண்பர்களானவர்கள்.
இவர்கள் ஆன்லைன் வர்த்தகம் செய்ய பயிற்சி பெற்றுள்ளனர். தொடர்ந்து கடந்த மூன்றரை ஆண்டுகளாக திருவேற்காடு பகுதியில் வாடகைக்கு வீடு எடுத்து ஆன்லைன் வர்த்தகம் செய்து வந்துள்ளனர்.
இவர்கள் சமூக வலைதளம் ஒன்றில் அந்நியச் செலாவணி வர்த்தகம், ஆன்லைன் வர்த்தகப் பயிற்சி வகுப்புகள் தொடர்பாக விளம்பரங்களைச் செய்து வந்துள்ளனர். இவ்விளம்பரங்களை நம்பி சுமார் 1,500 பேர், தலா ரூ.40 ஆயிரம் என, சுமார் ரூ.6 கோடி கட்டணம் செலுத்தி, பயிற்சியில் பங்கேற்றுள்ளனர்.
இந்த 3 நண்பர்கள், மூன்றரை ஆண்டுகளில், ஒரு குழுவுக்கு 40 முதல் 50 பேர் வரை என, 36 குழுக்களாகப் பங்கேற்ற 1,500 பேருக்கு ஆன்லைன் வர்த்தகப் பயிற்சி அளிப்பதாகக் கூறி, அங்கீகரிக்கப்படாத வர்த்தக வலைதளங்களில் முதலீடு செய்ய தூண்டியுள்ளனர்.
மேலும் அவர்கள் லட்சக்கணக்கில் லாபம் ஈட்டியதுபோல் பேசி, தங்களின் செல்போன்களில் லாபம் கிடைத்ததாகக் காட்டும் காட்சிகளை பதிவு செய்துள்ளனர்.
இக்காட்சிகளை சமூக வலைதளம் மூலம்வெளியிட்டு, பொதுமக்களிடையே நம்பிக்கையை ஏற்படுத்தி, அங்கீகரிக்கப்படாத அந்நியச் செலாவணி வர்த்தக வலை தளங்களில் முதலீடு செய்யத் தூண்டி, அதன் மூலம் பெருமளவில் பணம் சம்பாதிக்கத் திட்டமிட்டுள்ளனர் என விசாரணையில் தெரியவந்தது.
இதையடுத்து கவின்பிரசாந்த், கீர்த்திவாசன், பார்த்திபன் ஆகிய 3 பேரை நேற்று முன்தினம் ஆவடி இணைய வழி குற்றப்பிரிவு போலீஸார் கைதுசெய்து, அவர்கள் பயன்படுத்திய 3 செல்போன்களை பறிமுதல் செய்தனர்.
தொடர்ந்து, கைதானவர்களை பூந்தமல்லி ஜே.எம்-1 நீதிமன்றத்தில் ஆஜர்படுத்தி, சிறையில் அடைத்தனர். “அதிக லாபம் கிடைக்கும் எனக்கூறி வெளியிடப்படும் போலி ஆன்லைன் வர்த்தக விளம்பரங்களையாரும் நம்ப வேண்டாம்.
அறிமுக மில்லாத அல்லது அங்கீகாரம் சரிபார்க்கப்படாத செயலிகளைப் பதிவிறக்கம் செய்து பணம் முதலீடு செய்ய வேண்டாம்” என ஆவடி காவல் ஆணையரகம் கூறியுள்ளது.