திருவள்ளூர்: ஓய்வுபெற்ற டிஎஸ்பி வீடு உட்பட 2 வீடுகளில் 12 பவுன் நகைகள், ஒன்றரை கிலோ வெள்ளி, ரூ.35 ஆயிரம் திருடிய மர்ம நபர்களை போலீஸார் தீவிரமாக தேடி வருகின்றனர்.
திருவள்ளூர் அருகே சின்ன ஈக்காடு- ஸ்வேதா கார்டன் பகுதியைச் சேர்ந்தவர் ஜெயக்குமார் (35). தனியார் நிதி நிறுவன ஊழியரான இவர் கடந்த மாதம் 29-ம் தேதி தன் குழந்தைக்கு சிகிச்சை அளிப்பதற்காக குடும்பத்தினருடன் சென்னை, எழும்பூர் அரசு குழந்தைகள் நல மருத்துவமனைக்கு சென்றுள்ளார். இந்நிலையில் கடந்த 3-ம் தேதி ஜெயக்குமார் வீட்டின் கதவுகள் உடைக்கப்பட்டு இருந்தது தெரியவந்தது.
தகவலறிந்த ஜெயக்குமார் தன் வீட்டுக்கு விரைந்து வந்து பார்த்தபோது வீட்டின் பீரோவில் வைத்திருந்த 10 பவுன் நகைகள், ரூ.25 ஆயிரம் ரொக்கம், முக்கால் கிலோ வெள்ளிப் பொருட்களை மர்ம நபர்கள் திருடி சென்றிருப்பது தெரியவந்தது.
அதே போல், சின்ன ஈக்காடு பகுதியில் ஓய்வு பெற்ற டிஎஸ்பி ஜெயப்பிரகாஷ், 3 ஆண்டுகளுக்கு முன்பு உயிரிழந்த நிலையில் அவரது மனைவி வசந்தி (70) தனியாக வசித்து வருகிறார். இவர் கடந்த மாதம் 26-ம் தேதி, சென்னை, மடிப்பாக்கத்தில் உள்ள தன் மகள் வீட்டுக்குச் சென்றார்.
கடந்த 3-ம் தேதி, வசந்தி வசித்து வந்த வீட்டின் பூட்டும் உடைக்கப்பட்டு இருந்தது தெரிய வந்துள்ளது. இதையடுத்து நேற்று முன்தினம் வசந்தி வீட்டுக்கு வந்து பார்த்தபோது, பீரோவில் இருந்த சுமார் முக்கால் கிலோ எடையுள்ள 3 காமதேனு சிலைகள், கொலுசுகள், குங்குமச் சிமிழ் உள்ளிட்ட வெள்ளிப் பொருட்கள், 2 பவுன் நகைகள், ரூ.10 ஆயிரம் பணம் ஆகியவற்றை மர்ம நபர்கள் திருடிச் சென்றது தெரியவந்தது.இவ்விரு சம்பவங்கள் குறித்து, புல்லரம்பாக்கம் போலீஸார் வழக்குப் பதிவு செய்து விசாரணை மேற்கொண்டு, திருட்டு சம்பவங்களில் ஈடுபட்ட மர்ம நபர்களை தீவிரமாக தேடி வருகின்றனர்.