மனிதக்கழிவு கலந்ததாக கூறப்படும் மேல்நிலை நீர்த்தேக்கத் தொட்டி.
மயிலாடுதுறை: மயிலாடுதுறை அருகே உள்ள வில்லியநல்லூர் ஊராட்சி பன்னீர்வேலி கிராமத்தில் காளியம்மன் கோயில் எதிரில் மேல்நிலை நீர்தேக்கத் தொட்டி உள்ளது. 1995-ல் அமைக்கப்பட்ட 30 ஆயிரம் லிட்டர் கொள்ளளவு கொண்ட இந்த நீர்த்தேக்கத் தொட்டியில் இருந்து, அப்பகுதியில் உள்ள சுமார் 200 குடும்பங்களுக்கு குடிநீர் விநியோகம் செய்யப்பட்டு வருகிறது.
இந்நிலையில், அப்பகுதியைச் சேர்ந்த இளைஞர் ஒருவர் செல்போனில் டவர் கிடைக்காததால் மேல்நிலை நீர்தேக்கத் தொட்டி ஏணியின் மீது ஏறியுள்ளார். அப்போது துர்நாற்றம் வீசவே, தொட்டியின் மேல் பகுதிக்குச் சென்று பார்த்துள்ளார். குடிநீர் தொட்டியில் மனிதக்கழிவு கலக்கப்பட்டிருப்பது கண்டு அதிர்ச்சி அடைந்துள்ளார்.
இதுகுறித்து ஊரக வளர்ச்சித் துறை அதிகாரிகளுக்கு தகவல் தெரிவிக்கப்பட்டது. இதையடுத்து நேற்று அந்த தொட்டியில் இருந்து குடிநீர் விநியோகம் செய்வது நிறுத்தப்பட்டது. மனிதக்கழிவு கலந்த குடிநீரை ஆய்வுக்காக எடுத்து அனுப்ப உள்ளோம். பொதுமக்களுக்கு குடிநீர் வழங்க மாற்று ஏற்பாடுகள் செய்யப்பட்டுள்ளன’ என்று அதிகாரிகள் தெரிவித்துள்ளனர்.
இதுகுறித்து ஊர் மக்கள் கூறும்போது, “பல ஆண்டுகளாக குடிநீர் தொட்டியை சுத்தம் செய்யவில்லை. தொட்டியின் மேல்புற கான்கிரீட் உடைந்து விழும் நிலையில் உள்ளது. இந்தத் தொட்டியை அகற்றிவிட்டு, புதிய தொட்டி கட்டுவதுடன், தொட்டியில் மனிதக்கழிவு கலந்தவர்கள் மீது நடவடிக்கை எடுக்க வேண்டும்”என்றனர்.
இந்த சம்பவம் தொடர்பாக மாவட்ட காவல் கண்காணிப்பாளர் சினேகா பிரியா அளித்துள்ள விளக்கத்தில், ‘நீர்த்தேக்க தொட்டியில் மனிதக் கழிவு கலக்கப்படவில்லை. மேல்புறத்தில் உள்ள கான்கிரீட் தளத்தில்தான் மனிதக் கழிவு காணப்பட்டது. தீபாவளி அன்று இரவு அப்பகுதியில் வசிக்கும் ஒரு சிறுவன் அவசரத்தில் குடிநீர் தொட்டியின்மேல் இயற்கை உபாதையை கழித்துள்ளது தெரியவந்துள்ளது.
இதில் அச்சிறுவனுக்கு எந்தவித உள்நோக்கமும் இல்லை என்பதும் தெரியவந்துள்ளது என கூறியுள்ளார்.மனிதக்கழிவு கலந்ததாக கூறப்படும் மேல்நிலை நீர்த்தேக்கத் தொட்டி.