நுங்கம்பாக்கத்தில் பெட்ரோல் குண்டு வீசப்பட்ட இடத்தை பார்வையிடும் காவலர்.
சென்னை: மாணவிகளைப் பார்க்க வருவதை கண்டித்ததால் ஆத்திரம் அடைந்த ஆண் நண்பர்கள் நள்ளிரவில் வாகனங்கள் மீது பெட்ரோல் குண்டுகளை வீசியதால் நுங்கம்பாக்கம் பகுதியில் பரபரப்பு ஏற்பட்டது.
சென்னை நுங்கம்பாக்கம் புஷ்பா நகர் ராமலிங்க வள்ளலார் கோவில் அருகே நேற்று அதிகாலை கார் மற்றும் இருசக்கர வாகனங்கள் தீப்பிடித்து எரிவதாக நுங்கம்பாக்கம் போலீஸாருக்கு தகவல் கிடைத்தது.
இதையடுத்து போலீஸார் விரைந்து சென்று விசாரணை நடத்தினர். தடயவியல் நிபுணர்களும் சம்பவ இடத்தில் ஆய்வு மேற்கொண்டனர். அப்போது, பீர் பாட்டில்களில் பெட்ரோல் நிரப்பி, தீ வைத்து வாகனங்கள் மீது வீசியது தெரியவந்தது.
இதில் தீக்கிரையான கார், புஷ்பா நகரைச் சேர்ந்த வெங்கடேசன் என்பவருக்கு சொந்தமானது என்றும், இவர் திமுக வழக்கறிஞர் பிரிவின் பகுதி அமைப்பாளராக உள்ளதாகவும் கூறப்படுகிறது.
அதேபோல், அப்பகுதியைச் சேர்ந்த காமேஷ் கண்ணனுக்கு சொந்தமான இருசக்கர வாகனமும் சேதமடைந்தது. முதற்கட்டமாக போலீஸார் சம்பவ இடத்தில் உள்ள கண்காணிப்பு கேமராக்களின் காட்சிகளை ஆய்வு செய்தனர்.
விசாரணையில், கடந்த சில நாட்களாக புஷ்பா நகரில் வசிக்கும் 2 மாணவிகளைப் பார்ப்பதற்காக அவர்களது ஆண் நண்பர்கள் வந்து சென்றதாகவும், இதனை கவனித்த அப்பகுதி மக்கள் சிலர் அவர்களை கண்டித்ததாகவும் கூறப்படுகிறது.
இதனால் ஆத்திரமடைந்த இளைஞர்கள் சிலர் பெட்ரோல் குண்டுகளை வீசியதாக விசாரணையில் தெரியவந்ததாக போலீஸார் தெரிவித்தனர். இந்த சம்பவத்தில் ஒரு கார் மற்றும் 4 இருசக்கர வாகனங்கள் சேதமடைந்துள்ளன.
5 பேர் கைது
இந்நிலையில், கார் மீது பெட்ரோல் குண்டு வீசப்பட்ட விவகாரத்தில் மதுரவாயலைச் சேர்ந்த சுரஜ் (20), அசோக் நகரைச் சேர்ந்த முகுந்தன் (19), அதே பகுதியைச் சேர்ந்த ஆதிஷ் (19), கோடம்பாக்கம் பகுதியைச் சேர்ந்த 17 வயது சிறுவர்கள் இருவர் என 5 பேரை போலீஸார் கைது செய்து விசாரித்து வருகின்றனர்.
கண்டனம்
வி த லீடர்ஸ் இயக்கத்தின் மக்கள் தொடர்பு பொதுச் செயலாளர் கே.சுவாமிநாதன் வெளியிட்டுள்ள அறிக்கையில், “தலைநகரின் மையப்பகுதியான நுங்கம்பாக்கத்தில் பெட்ரோல் குண்டு வீசப்பட்டதாக வரும் செய்தி அதிர்ச்சியளிக்கிறது. குற்றவாளிகள் யாராக இருந்தாலும் உடனடியாகக் கண்டறியப்பட்டு கடும் நடவடிக்கை எடுக்கப்பட வேண்டும்.” என கூறியுள்ளார்.