திரைப்படத்தில் ஒரு கதாபாத்திரம் திரையில் தோன்றும் தருணத்தில் பார்வையாளர்கள் முதலில் கவனிப்பது அவரது தோற்றத்தைத்தான். அந்த தோற்றத்தை உருவாக்குவதில் ஆடை வடிவமைப்பாளர், சிகை அலங்காரக் கலைஞர், ஒப்பனையாளர், கலை இயக்குநர் மற்றும் ஒளிப்பதிவாளர் ஆகியோர் ஒன்றிணைந்து செயல்படுகின்றனர்.
சிறந்த ஆடையலங்காரம் என்பது வெறும் உடை மட்டுமே அல்ல; அது கதாபாத்திரத்தின் வாழ்க்கை வரலாறு, சமூக நிலை, மனநிலை மற்றும் கதையின் பயணத்தை வெளிப்படுத்தும் அமைதியான காட்சி மொழியாகும்.
ஆடை வடிவமைப்பின் தொடக்கம்
ஓர் ஆடை வடிவமைப்பாளர் முதலில் திரைக்கதையைப் படித்து ஒவ்வொரு கதாபாத்திரத்தையும் ஆராய்கிறார். அவர் எந்த காலகட்டத்தைச் சேர்ந்தவர்? எந்த சமூகப் பின்னணியில் வாழ்கிறார்? அவரின் பொருளாதார நிலை என்ன? கதையின் தொடக்கத்திலும் முடிவிலும் அவர் எவ்வாறு மாறுகிறார்? இந்தக் கேள்விகளுக்கான பதில்களின் அடிப்படையில் ஆடை வடிவமைப்பாளர் தனது முதல் ஸ்கெட்ச்சுகளை உருவாக்குவார்.
இந்த வடிவமைப்புகளுடன், துணி மாதிரிகள் (Fabric Swatches), நிற மாதிரிகள் (Color Samples), டெக்ஸ்ஸர் குறிப்புகள், நகை மற்றும் அணிகலன் யோசனைகள் ஆகியவையும் இணைக்கப்படும். பின்னர் இயக்குநர், ஒளிப்பதிவாளர், கலை இயக்குநர் ஆகியோருடன் விவாதித்து இறுதி வடிவம் உருவாக்கப்படும்.
ஆடை தயாரிப்பு: தையல், வாடகை மற்றும் சேகரிப்பு
திரைப்படத்தின் பட்ஜெட்டைப் பொறுத்து ஆடைகள், புதிதாகத் தயாரிக்கப்படலாம், வாடகைக்கு எடுக்கப்படலாம், தேர்ந்தெடுத்து புதிதாக வாங்கப்படலாம், பழமையான ஆடைகள் சேகரிக்கப்பட்டு மாற்றியமைக்கப்படலாம்.
பீரியட் திரைப்படங்களில் இது மிகவும் சிக்கலான பணி. ஒவ்வொரு பட்டனும், தையல் முறையும், துணி அமைப்பு மற்றும் அவற்றை அணியும் விதமும் அந்தக் காலகட்டத்துடன் பொருந்த வேண்டும். நடிகர்களுக்கான ஃபிட்டிங் அமர்வுகள் நடத்தப்பட்டு, அவர்கள் வசதியாக நடிக்கக்கூடியவாறு ஆடைகள் சரிசெய்யப்படுகின்றன.
சிகை அலங்காரம்: காலத்தின் காட்சிக் குறியீடு
சிகை அலங்காரம் ஒரு கதாபாத்திரத்தின் அடையாளத்தை உருவாக்கும் முக்கியமான கருவியாகும். ஒரு வீரனின் அலங்கோலமான முடி, ஓர் அரசியின் நேர்த்தியான பின்னல், ஒரு தொழிலதிபரின் கட்டுப்பாடான ஹேர்ஸ்டைல் — இவை அனைத்தும் கதையைச் சொல்லத் தொடங்கிவிடுகின்றன.
பொன்னியின் செல்வன், பாகுபலி, பிரேவ்ஹார்ட் போன்ற திரைப்படங்களில் சிகையலங்கார வடிவமைப்பு, காலகட்டத்தை உயிர்ப்பித்த முக்கிய அம்சமாக இருந்தது.
டெக்ஸ்ஸர், ஆடையின் காட்சித் தாக்கம்
ஒரு ஆடையின் நிறத்தை விட அதன் டெக்ஸ்ஸர் சில நேரங்களில் அதிக முக்கியத்துவம் பெறுகிறது. பட்டு, வெல்வெட், பருத்தி, கம்பளி, தோல் ஆகிய ஒவ்வொன்றும் ஒளியை வெவ்வேறு விதமாகக் கையாளுகின்றன.
வெல்வெட், ஒளியை உறிஞ்சுகிறது. பட்டுத்துணி ஒளியை பிரதிபலிக்கிறது. இதனால் ஒரே நிறத்தில் இருக்கும் 2 ஆடைகள் கூட கேமராவில் முற்றிலும் வேறுபட்டுத் தோன்றலாம்.
லென்ஸுகள், கேமரா சென்சார்கள் மற்றும் ஆடைகள்
இன்றைய டிஜிட்டல் கேமராக்கள் மிகத் துல்லியமான விவரங்களைப் பதிவு செய்கின்றன. ஆரி அலெக்ஸா, சோனி வெனிஸ், ரெட் வி-ரேப்டார் போன்ற கேமராக்கள் ஆடையின் நுணுக்கமானத் நெசவு அமைப்புகளையும் கூடப் பதிவு செய்கின்றன.
இதனால், ஆடை வடிவமைப்பில் இருக்கும் கோடுகள், நுண் வடிவங்கள், சில நேரங்களில் “மோயர்” (Moir) எனப்படும் காட்சிப் பிழைகளை உருவாக்கலாம்.
அதனால் கேமரா டெஸ்ட்டுகள் மற்றும் காஸ்ட்யூம் டெஸ்ட்டுகள் மிகவும் அவசியமாகின்றன. பழைய அனமார்பிக் லென்ஸ்களில் அழகாகத் தெரியும் ஆடை, நவீன டிஜிட்டல் சென்சார்களில் வேறுபட்டு தோன்றலாம்.
நிறத் திட்டம் (Color Palette)
ஒரு திரைப்படத்தின் காட்சிமொழியை உருவாக்குவதில் நிறங்கள் மிகவும் முக்கியமானவை. ஆடை வடிவமைப்பாளரும் ஒளிப்பதிவாளரும் இணைந்து ஒரு “Color Palette” உருவாக்குகின்றனர்.
காதல் படங்கள் – மென்மையான நிறங்கள், த்ரில்லர்கள் – அடர் சாம்பல் மற்றும் நீலம், வரலாற்றுப் படங்கள் – மண் சார்ந்த நிறங்கள், அறிவியல் புனைக்கதை – உலோக மற்றும் நியான் நிறங்கள். சில நேரங்களில் கதாநாயகனை கூட்டத்திலிருந்து தனித்துக் காட்டுவதற்காகத் திட்டமிட்ட நிறங்கள் பயன்படுத்தப்படுகின்றன.
ஒளிப்பதிவாளரின் நிறத் தேர்வு பல நேரங்களில் இறுதி நிறத்தை ஒளிப்பதிவாளரே முடிவு செய்கிறார். ஏனெனில், எந்த நிறம் எந்த ஒளியில் எப்படி செயல்படும்? கலர் கிரேடிங்கிற்குப் பிறகு அது எப்படி மாறும்? பின்னணியிலிருந்து கதாபாத்திரம் பிரிந்து தெரியுமா? என்பதை அவர் அறிவார்.
சில நேரங்களில் தூய வெள்ளைக்குப் பதிலாக Off White பயன்படுத்தப்படலாம். சில நேரங்களில் சிவப்பு நிறம் சற்று அடக்கப்படலாம். இது அனைத்தும் கேமரா மற்றும் ஒளியின் தேவைக்கேற்ப முடிவு செய்யப்படுகிறது.
காஸ்ட்யூம் மற்றும் லைட்டிங் கன்டினியுட்டி
திரைப்படங்கள், கதை வரிசைப்படி படமாக்கப்படுவதில்லை. எனவே சட்டை எவ்வளவு அழுக்காக இருந்தது? மழையில் எவ்வளவு நனைந்தது? ரத்தக் கறை எங்கே இருந்தது? போன்ற விவரங்கள் அனைத்தும் பதிவு செய்யப்படுகின்றன.
இதுவே காஸ்ட்யூம் கன்டினியுட்டி. அதேபோல் லைட்டிங் கன்டினியுட்டியும் முக்கியம். ஒரே காட்சியில் ஒரு ஆடை காலை ஒளியில் ஒரு விதமாகவும் மாலை ஒளியில் வேறுவிதமாகவும் தோன்றக்கூடாது.
ஆபத்தான காட்சிகள் மற்றும் டபுள் காஸ்ட்யூம்ஸ்
சண்டைக் காட்சிகள் மற்றும் மழைக் காட்சிகளுக்காக ஒரே ஆடையின் பல பிரதிகள் தயாரிக்கப்படுகின்றன. இதனை டபுள் காஸ்ட்யூம்ஸ் என்கிறார்கள். பெரிய பட்ஜெட் திரைப்படங்களில் முப்பது பிரதிகள் கூட தயாரிக்கப் படுகின்றன. இதனால் கன்டினியூட்டி பாதுகாக்கப்படுகிறது.
மெமோயர்ஸ் ஆஃப் கெய்ஷா : ஆடைகள் மூலம் சொல்லப்பட்ட வாழ்க்கை
ஆடை வடிவமைப்பாளர் கொலீன் அட்வுட் உருவாக்கிய இத்திரைப்படத்தில் கதாநாயகி அணியும் ஒவ்வொரு கிமோனோவும் அவளது வாழ்க்கையின் ஒரு கட்டத்தைக் குறிக்கிறது. ஏழை மீனவரின் மகள், நடனப்பயிற்சி பெறும் இளம் பெண், புகழ்பெற்ற கெய்ஷா என அவளது பயணத்தை ஆடைகளின் மூலமே பார்வையாளர்கள் உணர்கிறார்கள்.
கிரீன் மேட் மற்றும் ஆடை வடிவமைப்பு
இன்றைய விஎஃப்எக்ஸ் திரைப்படங்களில் க்ரீன் மற்றும் ப்ளூ ஸ்க்ரீன் முக்கிய பங்கு வகிக்கின்றன. பச்சை பின்னணியில், பச்சை ஆடைகள் தவிர்க்கப்பட வேண்டும். நீலப் பின்னணியில், நீல நிற ஆடைகள் தவிர்க்கப்பட வேண்டும்.
இல்லையெனில் குரோமா கீ செயல்பாட்டின் போது ஆடையின் பகுதிகள் காணாமல் போகலாம். மேலும் க்ரீன் ஸ்பில் எனப்படும் பச்சைப்பிரதிபலிப்பு வெள்ளை மற்றும் பளபளப்பான துணிகளில் படியலாம்.
லென்ஸ் ஃபிளேர் மற்றும் ஆடைகள்
அனமார்பிக் லென்ஸுகள் மற்றும் விண்டேஜ் லென்ஸுகள் பயன்படுத்தப்படும் போது லென்ஸ் ஃபிளேர்கள் உருவாகின்றன. உலோக நகைகள், கண்ணாடி வேலைப்பாடுகள், பட்டு ஆடைகள் ஒளியைப் பிரதிபலித்து அழகான ஃபிளேர்களை உருவாக்குகின்றன. லாரன்ஸ் ஆஃப் அரேபியா, ட்யூன், டாப் கன் மேவ்ரிக் போன்ற படங்களில் இது காட்சியின் ஒரு பகுதியாகவே பயன்படுத்தப்பட்டுள்ளது.
கேமரா இயக்கம், ஆடைகளின் உயிரோட்டம்
ஒரு ஆடை நிலையாக இருக்காது; அது கேமராவுடன் சேர்ந்து இயங்கும். காற்றில் பறக்கும் மேலங்கி, போர்க்களத்தில் அசையும் கொடி போன்ற உடைகள். இவை அனைத்தும் கேமரா இயக்கத்துடன் இணைந்தே திட்டமிடப்படுகின்றன. சில நேரங்களில் ஒரு ஆடை கதாபாத்திரத்தை விட அதிகமாக நினைவில் நிற்கும்.
(புதன்தோறும் ஒளிகாட்டுவோம்)
- cjrdop@gmail.com