சங்க உறுப்பினர்கள் வெற்றி: தென்னிந்திய நடிகர் சங்கம் வாழ்த்து

தமிழக தேர்தலில் சங்கம் உறுப்பினர்கள் வெற்றி பெற்றதற்கு தென்னிந்திய நடிகர் சங்கம் வாழ்த்து தெரிவித்துள்ளது.

தமிழக சட்டப்பேரவைத் தேர்தலில் விஜய்யின் தவெக அதிக தொகுதிகளில் வெற்றி பெற்றுள்ளது. முதல்வராக விஜய் பதவியேற்க உள்ளார். அதற்கான விஷயங்கள் தீவிரமாக நடைபெற்று வருகின்றன. ஆட்சியமைக்க கூடிய பெரும்பான்மை இல்லாத காரணத்தினால் சில கட்சிகள் தவெக உடன் கூட்டணி அமைத்து விஜய் முதல்வராக பொறுப்பேற்பார் என தெரிகிறது.

இதனிடையே தமிழக சட்டமன்றத் தேர்தலில் போட்டியிட்டு வெற்றி பெற்றுள்ள சங்க உறுப்பினர்களுக்கு, தென்னிந்திய நடிகர் சங்கம் வாழ்த்து தெரிவித்து அறிக்கை ஒன்றை வெளியிட்டுள்ளது.

அந்த அறிக்கையில், “2026-ம் ஆண்டு நடைபெற்ற தமிழக சட்டமன்றத் தேர்தலில் போட்டியிட்டு வெற்றி பெற்று சட்டமன்ற உறுப்பினர்களாகத் தேர்ந்தெடுக்கப்பட்ட தென்னிந்திய நடிகர் சங்கத்தின் உறுப்பினர்களான விஜய், உதயநிதி ஸ்டாலின் மற்றும் பார்த்திப ராஜா ஆகிய மூவரையும் முன்னிட்டு தென்னிந்திய நடிகர் சங்கம் பெருமையும், மகிழ்ச்சியும் கொள்கிறது.

மேலும், நிறைவடைந்து வரும் தென்னிந்திய நடிகர் சங்கத்தின் புதிய கட்டிடத்திற்காக தக்க சமயத்தில் விஜய் மற்றும் உதயநிதிஸ்டாலின் கணிசமான நிதி வழங்கி உதவியதை இச்சமயத்திலும், என்றும் நினைவுகூற கடமைப்பட்டுள்ளோம்.

தமிழ்நாட்டின் முன்னேற்றத்திற்கும், மக்கள் நலத்திற்கும் சிறப்பான பங்களிப்பை வழங்கிட, தமிழ்நாடு சட்டமன்ற உறுப்பினர்களாக தேர்ந்தெடுக்கப்பட்ட தென்னிந்திய நடிகர் சங்கத்தின் உறுப்பினர்களுக்கு இதயப்பூர்வமான பாராட்டுகளையும், மனமார்ந்த நல்வாழ்த்துகளையும் தெரிவித்துக் கொள்கிறோம்” என்று தெரிவித்துள்ளது தென்னிந்திய நடிகர் சங்கம்.