சந்தோஷ் பிரதாப், தீப்ஷிக்ஹா, மாஸ்டர் சஷாந்த், அரிமா, மஹித்ரா, கலைக்கோ, தம்பி ராமையா, ஜெகன், சம்பத் ராம் என பலர் நடித்துள்ள படம், ‘மரகத மலை’.
எல்.ஜி.மூவிஸ் சார்பில் எஸ்.லதா தயாரித்து, எழுதி, இயக்கியுள்ள இப்படம் ஃபேன்டஸி டிராமா கதையை கொண்டது. எல்.வி.முத்து கணேஷ் இசை அமைத்துள்ளார்.
பி.ஜி.முத்தையா ஒளிப்பதிவு செய்துள்ளார். குழந்தைகளை மகிழ்விக்கும் வகையில் உருவாகியுள்ள இப்படத்தின் இசை மற்றும் டிரெய்லர் வெளியீட்டு விழா, சென்னையில் நடைபெற்றது. படக்குழுவினர் கலந்து கொண்டனர்.
தயாரிப்பாளர் தனஞ்செயன் பேசும்போது, “கதை, திரைக்கதை, வசனம், பாடல்கள், இயக்கம் என அனைத்தையும் லதா செய்திருப்பது பாராட்டத்தக்கது, சிறப்பான முயற்சி. இந்த படத்தில் சந்தோஷ் பிரதாப் முக்கிய பங்களிப்பு செய்துள்ளார். அனிமேஷன் மற்றும் கிராபிக்ஸ் காட்சிகள் அழகாக உருவாக்கப்பட்டுள்ளன.
தமிழ் சினிமா தற்போது சவால்களைச் சந்தித்தாலும், நல்ல படங்கள் வந்தால் மக்கள் கண்டிப்பாக ஆதரிப்பார்கள். சிறந்த கதையுடன் படங்களை உருவாக்கினால் வெற்றி நிச்சயம் கிடைக்கும். தமிழ் சினிமாவில் ஒவ்வொரு மாதமும் நல்ல படம் வந்து ஜெயித்துக் கொண்டு இருக்கிறது” என்றார். ஏப்.3-ம் தேதி படம் வெளியாகிறது.