திரைப் படத்தில் இடம்பெறும் பாடல் காட்சி பல நேரங்களில் கதையை முன்னோக்கி நகர்த்துகிறது; சில நேரங்களில் கதாபாத்திரங்களின் மனநிலையை, காதலை, கொண்டாட்டத்தை, வேதனையை, வார்த்தைகளைக் காட்டிலும் வலிமையாகச் சொல்கிறது.
இதை உருவாக்கும் 2 முக்கியமான கலைஞர்கள்,நடன இயக்குநர் மற்றும் ஒளிப்பதிவாளர். ஒருவர் இசைக்கு உடல்மொழியை உருவாக்குகிறார்; மற்றொருவர் அதை திரையில் உயிர்ப்பிக்கிறார். ஒருவர் இல்லாமல் மற்றொருவரின் பணி முழுமை பெறாது. சிறந்த பாடல் காட்சிகள் எப்போதும் இந்த இருவரின் ஆழமான புரிதலின் விளைவாகவே உருவாகின்றன.
பாடலின் சூழல்: திரைக்கதையில் ஒரு பாடல் எதற்காக வருகிறது என்பதைப் புரிந்து கொள்வதே படைப்பாக்கத்தின் முதல்படி. இசையமைப்புக்குப் பிறகு, நடன இயக்குநர் திரைப்பட இயக்குநரிடம் கேட்கும் முதல் கேள்வி: “இந்தப் பாடலின் சூழல் என்ன?” அதுதான் நடன அமைப்பையும், காட்சியமைப்பையும் தீர்மானிக்கிறது. கதாநாயகனின் அறிமுகப் பாடலுக்குப் பயன் படுத்தப்படும் கேமரா கோணங்களும் நடன அசைவுகளும், சோகப் பாடல் அல்லது மென்மையான காதல் பாடல்களுக்கு முற்றிலும் மாறுபட்டதாக இருக்கும்.
பாடல் வகைகளும் காட்சி அணுகுமுறையும்: பாடலின் தன்மையைப் பொறுத்தே நடன அமைப்பும், ஒளிப்பதிவாளரின் கேமரா மொழியும் மாறுகின்றன.
நடனப் பாடல்கள் முழுக்க நடனத்தை மையமாகக் கொண்டவை. காதல் பாடல்களில் நடனத்தைவிட உணர்ச்சிக்கே முதன்மை முக்கியத்துவம் அளிக்கப்படுகிறது. கேமரா மென்மையாகவும், நளினமாகவும் நகரும். குளோஸ்-அப், மீடியம் ஷாட் மற்றும் பரந்த நிலப்பரப்புக் காட்சிகளின் மூலம் காதலின் ஆழமான உணர்வுகளை ஒளிப்பதிவாளர் வெளிப்படுத்துவார்.
காட்சித்தொகுப்புப் பாடல்கள் (Montage Songs): இவ்வகைமையில் முறையான நடன அசைவுகள் இருக்காது. கதையின் காலப்போக்கு, வாழ்க்கை மாற்றம், பயணம், வெற்றி, தோல்வி போன்றவை சிறு காட்சிகளாகத் தொகுக்கப்பட்டு எடிட்டிங், ஒளிப்பதிவு, இசை ஆகியவை இணைந்து உணர்வுகளை உருவாக்குகிறது.
தாள நயமும் ‘பார் கணக்குகளும்’: பதிவு செய்யப்பட்ட பாடலை பலமுறைகேட்டு அதன் ரிதம், டெம்போ, பீட், எமோஷன் மற்றும் பாடலின் வரிகளை ஆழமாக ஆராய்வார் நடன இயக்குநர். இவர்கள் இசையை, 2, 4, 8 ஆகிய எண்ணிக்கைகளைக் கொண்ட அடிப்படைத் தாளக் கட்டமைப்பை (Bar Counts) முதன்மைத் தளமாகக் கொள்கின்றனர்.
இந்த 8 எண்ணிக்கைகளே ஓர் அடிப்படை இசை அலகு(Bar). ஒரு முழுப் பாடல் 16, 32, அல்லது 64 பார் கணக்குகளாகப் பிரிக்கப்பட்டு, ஒவ்வொரு பகுதிக்கும் தனித்தனி உடலசைவுகள் வடிவமைக்கப்படுகின்றன. படப்பிடிப்பின்போது செட்டில் இந்த மொழியே ஒளிப்பதிவுக் குழுவுக்கும் பயன்படுத்தப்படுகிறது:
“12-வது பாரில் கிரேன் உயரும்...”
“24-வது பாரில் ஹீரோ என்ட்ரி ”
“40-வது பாரில் ஸ்மோக் எஃபெக்ட் ” எனக் கணக்கிடுவதன் மூலம் இசை, நடனம், ஒளிப்பதிவு, மற்றும் எடிட்டிங் அனைத்தும் ஒரே சீரான தாளத்தில் இயங்குகின்றன.
பல துறைகளின் ஒருங்கிணைப்பு: ஒரு பிரம்மாண்டமான பாடல் காட்சியில் நடன இயக்குநர், ஒளிப்பதிவாளர், ஆடை வடிவமைப்பாளர், கலை இயக்குநர், மேக்கப் குழு மற்றும் வி.எஃப்.எக்ஸ் சூப்பர்வைசர் ஆகியோர் இணைந்து செயல்படுகின்றனர்.
ஒளிப்பதிவாளரின் பங்கு மற்றும் லென்ஸ் தேர்வுகள்: ஒரு சிறந்த நடனத்தை திரையில் எவ்வாறு காட்ட வேண்டும் என்பதை ஒளிப்பதிவாளரே தீர்மானிக்கிறார்.
வைடு லென்ஸ்: 21 எம்எம் முதல் 35 எம்எம் வரையிலான லென்ஸுகள் இடவெளி ஆழத்தை அதிகரிக்கும். குதித்தல், சுழலுதல் போன்றவை மிகவும் வேகமாகவும் பிரம்மாண்டமாகவும் காட்சியளிக்கும்.
டெலிபோட்டோ லென்ஸ்: 85 எம்எம் முதல் 135எம்எம்+ வரையிலான லென்ஸுகள் பின்னணியையும் முன்னணியையும் ஒன்றுக்கொன்று நெருக்கமாகக் காட்டும். குழு நடனங்களில் அனைத்துக் கலைஞர்களும் சீரான வரிசையில் இருப்பது போன்ற அடர்த்தியான தோற்றத்தை உருவாக்கும்.
கேமராவும் ஒரு நடனக் கலைஞரே: சிறந்த பாடல் காட்சிகளில் கேமரா, நடனக் கலைஞராகவே மாறுகிறது.
ஸ்டெடிகேம்: நடனக் கலைஞர்களோடு சேர்ந்து 360 டிகிரியில் நகர்ந்து, பார்வையாளரும் அந்தக் கூட்டத்துக்குள் இருப்பது போன்ற நேரடி உணர்வைத் தரும்.
டாலி: கலைஞர்களின் நகர்வுக்கு இணையாக ட்ராக்கில் நகர்ந்து, அசைவுகளின் தொடர்ச்சியையும் நளினத்தையும் அழகாகக் காட்டும்.
டெக்னோகிரேன்: மேலிருந்து கீழ் நோக்கி அல்லது கோணங்களை மாற்றி நகர்ந்து, பெரிய அளவிலான குழு வடிவங்களை உயரத்திலிருந்து காட்டும்.
ஹேண்ட்ஹெல்ட்: தெரு நடனம், ஹிப்-ஹாப் காட்சிகளில் கலைஞர்களைப் பின் தொடர்ந்து, காட்சியின் இயல்பான சுறுசுறுப்பையும் வேகத்தையும் அதிகரிக்கும்.
எஃப்.பி.வி.ட்ரோன்: நடனக் கலைஞர்களுக்கு மிக அருகில், மிக வேகமாகப் பறந்து சென்று வழக்கத்துக்கு மாறான சுழல் கோணங்களை கொடுக்கிறது.
மோஷன் கன்ட்ரோல் ரிக்: ஒரே கேமரா நகர்வை மில்லிமீட்டர் பிசகாமல் பலமுறை திரும்பச் செய்து, ஒரே கலைஞர் பல வடிவங்களில் வந்து நடனமாடும் காட்சிகளைத் துல்லியமாகப் படமாக்க உதவுகிறது.
எல்.இ.டி வால்யூம் / விர்சுவல் புரொடக் ஷன்: வெளிநாடுகளுக்குச் செல்லாமலே, 360 டிகிரி எல்இடி திரைகளின் முன்னால் தத்ரூபமான பின்னணியில், ஒளியமைப்பையும் இசையையும் ஒருங்கிணைத்து படப்பிடிப்பை நடத்த இது பயன்படுகிறது.
படப்பிடிப்புக்கு முந்தைய ஒத்திகை: நடன இயக்குநர் கண்ணாடி ஒத்திகை அரங்கில் (Mirror Studio) நடனத்தை வடிவமைப்பார். ஆனால் கேமரா அதை வேறு கோணத்தில் பார்க்கும். படப்பிடிப்புக்கு முன்பே நடன இயக்குநரும் ஒளிப்பதிவாளரும் இணைந்து, தரைக்கோடு குறியீடு (Floor Marking), கேமரா நகர்வுத் திட்டமிடல் (Camera Blocking),லென்ஸ் சோதனை (Lens Test), காட்சிப் பிரிப்பு (Shot Division) ஆகியவற்றைத் திட்டமிடுவார்கள். இதில் ஸ்டெடிகேம் ஆபரேட்டர் மற்றும் கிரேன் ஆபரேட்டருக்குத் தனியாக ‘கேமரா ஒத்திகை’ நடத்தப்படும்.
எடிட்டரின் பங்கு: ஒரு பாடல் முழுமையாக உயிர் பெறுவது எடிட்டிங் டேபிளில்தான். நடன இயக்குநர் பார் கணக்குகளில் வடிவமைத்த அசைவுகளும், ஒளிப்பதிவாளர் படமாக்கிய கேமரா நகர்வுகளும், இசையின் பீட்டுக்கு ஏற்ப கட் செய்யப்படும்போது மட்டுமே பாடலின் முழுத் தாக்கமும் உருவாகிறது. சரியான கணக்கில் செய்யப்படும் ஒரு கட், நடனத்தின் வேகத்தையும் உணர்ச்சியையும் பல மடங்கு உயர்த்தும்.
லா லா லேண்ட்: ஒளிப்பதிவாளர் லைனஸ் சேன்ட்க்ரென் (Linus Sandgren), நடன இயக்குநர் மேண்டி மூர் (Mandy Moore) இணையில் உருவான ‘Another Day of Sun’ மற்றும் ‘A Lovely Night’ ஆகிய பாடல்களில் கேமராவும் நடனமும் ஒரே மூச்சில் தடையின்றி இயங்குவதைக் காணலாம்.
ஆர்.ஆர்.ஆர் (நாட்டு நாட்டு): ஒளிப்பதிவாளர் கே.கே.செந்தில்குமார், நடன இயக்குநர் பிரேம் ரக் ஷித் ஆகியோரின் ஒருங்கிணைப்பில் உருவான ஆஸ்கர் வென்ற இப்பாடலில், வேகமான காலடி அசைவுகளும் அதற்கேற்ப நகர்ந்த கேமராவும் மாபெரும் வரவேற்பைப் பெற்றன. ஒரு பாடல் காலத்தைக் கடந்து மக்களின் நினைவில் வாழ்வதற்குக் காரணம் இசையைக் காட்சியாக மாற்றிய நடன இயக்குநரும், அந்தக் காட்சிக்கு உயிர் கொடுத்த ஒளிப்பதிவாளரும்தான்.
(புதன்தோறும் ஒளிகாட்டுவோம்)