நடிகை உமா
தமிழில், சொக்கத்தங்கம், கடல்பூக்கள், தென்றல், கோவை பிரதர்ஸ் உள்பட சில படங்களில் நடித்திருப்பவர் உமா. மலையாளம், கன்னடம், தெலுங்கு படங்களிலும் நடித்துள்ளார்.
2006ம் ஆண்டு துஷ்யத் என்பவரைத் திருமணம் செய்து கொண்ட அவர், திருமணத்துக்குப் பிறகு நடிக்கவில்லை. நடிகை சுமித்ராவின் மகளான இவர் மார்பகப் புற்றுநோயால் பாதிக்கப்பட்டு, அதற்காகச் சிகிச்சை மேற்கொண்டு வருகிறார்.
இந்நோயால் பாதிக்கப்பட்டிருப்பதை சில வாரங்களுக்கு முன் அறிவித்த அவர், இப்போது வெளியிட்டுள்ள பதிவில், “கீமோ மற்றும் இம்யூனோ சிகிச்சையின் 2-ம் கட்டத்தில் இருக்கிறேன். ஒவ்வொரு நாளையும் கடந்து வருகிறேன். சிரமமான நாட்களை எப்படிக் கையாள்வது என்பதைக் கற்றுக் கொள்கிறேன். அதேவேளை, உடல் வலிமையுடன் உணரும் நாட்களைக் மகிழ்ச்சியுடன் கொண்டாடுகிறேன்.
எப்போதும் எனக்குத் துணையாக நிற்கும் என் குடும்பத்தாருக்கும் அன்பு மற்றும் ஆதரவு காட்டும் ரசிகர்களுக்கும் நன்றி. சிகிச்சையைத் தொடர்ந்து மேற்கொள்கிறேன், குணமடைந்து வருகிறேன், முன்னேற்றத்தில் கவனம் செலுத்துகிறேன். அது முழுமையானதாக இல்லா விட்டாலும், உண்மையானது” என்று தெரிவித்துள்ளார். அவர் விரைவில் குணமடைய ரசிகர்கள் அவருக்கு வாழ்த்துகளைத் தெரிவித்து வருகின்றனர்.