தமிழில் ‘தடையறத் தாக்க’, ‘என்னமோ ஏதோ’, ‘ஸ்பைடர்’, ‘தீரன் அதிகாரம் ஒன்று’, ‘இந்தியன் 2’ உள்பட பல படங்களில் நடித்துள்ளார் ரகுல் ப்ரீத் சிங். இந்தி, தெலுங்கு படங்களில் நடித்து வரும் அவர், உடற்பயிற்சிக்கு முக்கியத்துவம் கொடுப்பவர்.
கடந்த 2024-ம் ஆண்டு இறுதியில் ஜிம்மில் 80 கிலோ எடையைத் தூக்கும் போது முதுகில் பலத்த காயம் அடைந்தார். இதற்காக சிகிச்சைப் பெற்று வந்தார்.
இந்நிலையில், 18 மாதங்களுக்குப் பிறகு உடற்பயிற்சியை மீண்டும் தொடங்கியுள்ளதாகக் கூறியுள்ளார். இது குறித்து அவர் கூறும்போது, “ஒவ்வொரு பயணத்திலும் யாரும் எதிர்பார்க்காத ஓர் அத்தியாயம் இருக்கும். எனக்கு அது காயத்தின் வடிவில் வந்தது. ஒவ்வொரு நாளும் இன்னும் வலிமையாக மாற வேண்டும் என்ற இலக்குடன் இருந்த போது, அந்தக் காயம் என் பயணத்தைத் திடீரென நிறுத்திவிட்டது.
அது எனக்கு பல பாடங்களைக் கற்றுக் கொடுத்தது. குறிப்பாகப் பொறுமையைக் கற்றுக் கொடுத்தது. முன்பு புதிய உடற்பயிற்சி இலக்குகளை அடைய வேண்டும் என்பதில்தான் என் கவனம் இருந்தது. ஆனால், இந்தக் காயத்துக்குப் பிறகு நல்ல உடல்நிலையை மீண்டும் பெறுவதுதான் முக்கியம் என்பதை உணர்ந்தேன்.
ஜிம்முக்குள் மீண்டும் நுழைந்தது, நீண்ட நாட்களுக்குப் பிறகு வீட்டுக்குத் திரும்பியதைப் போல உணர வைத்தது. நான் பழைய மனிதராகத் திரும்ப வரவில்லை; மனவலிமை, நன்றியுணர்வு மற்றும் புதிய பார்வையுடன் புதிய அத்தியாயத்தைத் தொடங்க வந்திருக்கிறேன்” என்று தெரிவித்துள்ளார்.