கீது மோகன்தாஸ் இயக்கத்தில் யாஷ் நடித்துள்ள படம், ‘த டாக்ஸிக்’. ஆங்கிலம் மற்றும் கன்னடத்தில் உருவாகியுள்ள இப்படம் தமிழ் உள்ளிட்ட மொழிகளில் மொழி மாற்றம் செய்யப்பட்டு வெளியாக இருக்கிறது.
மார்ச் 19-ல் ரிலீஸாகும் இப்படத்தில் கியாரா அத்வானி, நயன்தாரா, ஹூமா குரேஷி, ருக்மணி வசந்த், தாரா சுதாரியா உள்பட பலர் நடித்துள்ளனர். இவர்களின் கதாபாத்திர போஸ்டர்கள் வெளியிடப்பட்ட நிலையில் யாஷின் பிறந்த நாளை முன்னிட்டு அவருடைய கதாபாத்திர போஸ்டரும் டீஸரும் வெளியிடப்பட்டது. இதில் அவர் ‘ராயா’ என்ற கதாபாத்திரத்தில் நடித்துள்ளார்.
இந்நிலையில் யாஷ் பற்றி கீது மோகன்தாஸ் கூறும்போது, “திறமையும் சூப்பர் ஸ்டார் அந்தஸ்தும் ஒன்றாக அமைவது அபூர்வமான மற்றும் வலிமையான கலவையாகும். அப்படிப்பட்ட யாஷ் குறித்து பெருமைப்படுகிறேன். உலகம் விரைவில் காணவிருக்கும் ‘ராயா’ கதாபாத்திரத்தில் அவர் நடிப்பு மட்டுமல்லாமல், ஒவ்வொரு நாளும் அவருடைய அர்ப்பணிப்புக்காகவும் பெருமை கொள்கிறேன்” என்று தெரிவித்துள்ளார். இதற்கிடையே இந்தப் படத்தின் டீஸர் கடும் சர்ச்சையை ஏற்படுத்தியுள்ளது.
மம்மூட்டி நடித்த கசாபா படம் 2016-ல் வெளியானபோது, அந்தப் படத்தில் பெண்களை மோசமாகச் சித்தரித்துள்ளதாகவும் பெண் வெறுப்பு படம் என்றும் அப்படத்தின் இயக்குநர் நிதின் ரெஜி பணிக்கரை கீது மோகன்தாஸ் விமர்சித்திருந்தார். இது அப்போது பரபரப்பாகப் பேசப்பட்டது. இப்பேச்சு, அந்தப் படத்தின் இயக்குநர் மற்றும் கசாபா படம் மீதான சைபர் தாக்குதல்களுக்கும் வழி வகுத்தது.
இந்நிலையில் ‘டாக்ஸிக்’ டீஸரில் புகைபிடிப்பது, பெண்களின் உடலில் மதுவை ஊற்றுவது மற்றும் ஆண்மையைக் கொண்டாடுவது போன்ற காட்சிகள் இருப்பதாக சமூக ஊடகங்களில் கடும் விமர்சனங்கள் எழுந்துள்ளன. இப்படியொரு மோசமான காட்சியை வைத்தது ஏன் என்றும் அதை விளம்பரப்படுத்துவது என்ன மாதிரியான மனநிலை என்றும் ரசிகர்கள் கேள்வி எழுப்பியுள்ளனர். சில மலையாள இயக்குநர்களும் கடுமையாக விமர்சித்துள்ளனர்.