முதல் உலகப்போரில் நண்பர்களான மூன்று அமெரிக்கப் படைவீரர்கள், போருக்குப் பின் குற்ற உலகில் நுழைய, காதலும் துரோகமும் அவர்களை எதிரிகளாக்குவதே ‘தி ரோரிங் ட்வென்டீஸ் (THE ROARING TWENTIES- 1939)’ திரைப்படத்தின் ஒருவரிக் கதை.
1918-ல் முதல் உலகப்போரின் அகழிகளில் அமெரிக்க வீரர்களான எட்டி, ஜார்ஜ், லாயிட் மூவரும் சந்திக்கிறார்கள். ராணுவ வீரர்களை உற்சாகப்படுத்த வரும் கடிதங்களில், ஜீன் என்ற இளம்பெண், எட்டியை ஹீரோவாகப் பாவித்துக் கடிதம் எழுதியிருக்கிறாள். போர் முடிந்து மூவரும் பிரிகிறார்கள். நாடு திரும்பும் எட்டிக்கு பழைய மெக்கானிக் வேலை கிடைக்கவில்லை. வேலை தேடி அலைந்து விரக்தியடையும் அவன், நண்பன் டானியுடன் இணைந்து டாக்ஸி ஓட்டுகிறான்.
1920-ல் அமெரிக்காவில் மதுவிலக்குச் சட்டம் அமலாக, கள்ளச்சாராய வியாபாரம் பெருகுகிறது. ஒரு கள்ளச்சாராயப் பார்சலை, பனாமா என்ற பெண்ணிடம் டெலிவரி செய்யும்போது போலீஸில் சிக்குகிறான் எட்டி. பனாமாவுக்காகப் பழியை ஏற்றுச் சிறை செல்லும் அவனை, அபராதம் கட்டி மீட்கும் பனாமா, கள்ளச்சாராய லாபத்தைக் காட்டுகிறாள். மாபெரும் கள்ளச்சாராயச் சாம்ராஜ்யத்தை உருவாக்குகிறான் எட்டி. நேர்மையான நண்பன் லாயிட் அவனது வழக்கறிஞராகிறான்.
போரின்போது கடிதம் எழுதிய ஜீனை சந்திக்கும் எட்டி, தனது கிளப்பில் அவளுக்குப் பாடகி வேலை தருகிறான். அவள்மீது காதல் வயப்படுகிறான். ஆனால் அவளோ லாயிட்டைக் காதலிக்கிறாள்.
நிக் பிரவுன் என்ற தாதாவிடம் உயர்ரக சாராயத்தை விற்பனைக்குக் கேட்கிறான் எட்டி. அவன் மறுக்கவே, பிரவுனின் மதுபானக் கப்பலைக் கொள்ளையடிக்கிறான். அங்கு வேலை செய்யும் ஜார்ஜை சந்தித்து, இருவரும் பிரவுனுக்குத் துரோகம் செய்து கூட்டாளிகளாகிறார்கள்.
கொள்ளையடித்த எட்டியைப் பழிவாங்க பிரவுன் அவனது கிளப்பைத் தாக்குகிறான். வன்முறை பிடிக்காமல் லாயிட், எட்டியிடமிருந்து விலகுகிறான். தங்களைக் கொல்லத் திட்டமிடும் பிரவுனை சுட்டுக் கொல்கிறார்கள் எட்டியும் ஜார்ஜும்.
ஜீன் – லாயிட் காதல் விவகாரம் தெரிந்து மனமுடைகிறான் எட்டி. போரின்போது உற்சாகப்படுத்த எழுதப்பட்ட கடிதங்கள் காதலுக்கு உத்தரவாதமல்ல என்பதை உணர்கிறான்.
1929-ல் பங்குச்சந்தை வீழ்ச்சியின்போது எட்டியும் தனது செல்வத்தை இழக்கிறான். பணத் தேவைக்காக ஜார்ஜை அணுகுகிறான். சந்தர்ப்பத்தைப் பயன்படுத்திக்கொள்ளும் ஜார்ஜ், எட்டியின் நிறுவனத்தைச் சொற்ப தொகைக்கு எழுதி வாங்கிவிட்டு, அவனுக்கு ஒரே ஒரு டாக்ஸியை மட்டும் விட்டுத் தருகிறான்.
மதுவிலக்குச் சட்டம் முடிவுக்கு வருகிறது. பல ஆண்டுகளுக்குப் பின், டாக்ஸி ஓட்டும் எட்டி, தனது வண்டியில் ஏறும் ஜீனை வீட்டில் இறக்குகிறான். லாயிட் இப்போது அரசு வழக்கறிஞராகி, பெரும் தாதாவாக வளர்ந்திருக்கும் ஜார்ஜுக்கு எதிராக வழக்குத் தொடரத் தயாராகிறான். லாயிட்டைக் கொல்ல ஜார்ஜ் திட்டமிடுவதை அறியும் ஜீன், தனது கணவனைக் காப்பாற்ற எட்டியிடம் கெஞ்சுகிறாள்.
முதலில் மறுக்கும் எட்டி, பனாமாவின் அறிவுரையால் ஜீனின் குடும்பத்தைக் காப்பாற்ற முடிவெடுக்கிறான். ஜார்ஜை தேடிச் சென்று அவனது ஆட்களுக்கு மத்தியிலேயே சுட்டுக் கொல்கிறான். அங்கிருந்து தப்பியோடும் எட்டி மீது குண்டு பாய்கிறது. பனி படர்ந்த தேவாலயப் படிகளில் சுருண்டு விழுந்து இறக்கிறான். தெருவில் கிடக்கும் சடலம் யாருடையது என்று விசாரிக்கும் போலீஸிடம் பனாமா, “இவன் ஒரு காலத்தில் பெரிய ஆளாக இருந்தான்” என்று கூறுவதோடு ஒரு கேங்ஸ்டர் யுகத்தின் காவிய வீழ்ச்சி முடிகிறது.
‘இது நிஜ மனிதர்களின் கலவை; சம்பவங்கள் உண்மையானவை’ என கதை ஆசிரியர் மார்க் ஹெல்லிங்கர் படத்தின் ஆரம்பத்திலேயே, ‘இப்படி ஒரு காலம் எதிர்காலத்தில் மீண்டும் வந்துவிடக் கூடாது’ என்ற எச்சரிக்கைக் குறிப்பைப் பதிவு செய்துள்ளார். ராபர்ட் ரோசன், ஜெர்ரி வால்ட், ரிச்சர்ட் மெக்காலே கூட்டணியின் அழுத்தமான திரைக்கதையும், ரவுல் வால்ஷின் பிரம்மாண்ட இயக்கமும் வார்னர் பிரதர்ஸின் தயாரிப்பும் அந்த இருண்ட காலகட்டத்தின் சாட்சியமான இப்படத்தை ஒரு வரலாற்று ஆவணமாகவும் கிளாசிக் காவியமாகவும் மாற்றியுள்ளன.
ஒளிப்பதிவு (எர்னி ஹாலர்): ஆஸ்கர் விருது வென்ற இவர், இரவுநேர நகரம், மதுக்கூடங்கள், கதாபாத்திரங்களின் முகங்கள் ஆகியவற்றில் ஒளி, நிழல்களின் வழியாக உணர்வுகளைக் கடத்துகிறார். கொலை, கொள்ளைக் காட்சிகளிலும் இறுதியில் தேவாலயப் படிகளில் நாயகன் வீழ்ந்து மடிவதிலும் ஒளிப்பதிவின் நேர்த்தி மனதைக் கவர்கிறது.
படத்தொகுப்பு (ஜாக் கிலிஃபர்): செய்தித்தாள்கள் சுழன்று வருவது, துப்பாக்கிகள் சுடப்படுவது, மது பீப்பாய்கள் உருளுவது என மாண்டேஜ் உத்திகள் மூலம் ஒரு தசாப்த கால வரலாற்றைச் சுருக்கமாகக் கடத்தியிருக்கிறார்.
நைட் கிளப் பாடல்கள் 1920-களின் ‘ஜாஸ் காலத்தை’ கண்முன் நிறுத்துகின்றன. லியோ எஃப். ஃபோர்ப்ஸ்டீனின் இசை இயக்கமும், ரே ஹெய்ண்டார்ஃபின் இசை ஒருங்கிணைப்பும் உணர்வுகளைச் சிறப்பாகக் கடத்துகின்றன. ஜான் டீரிங்கின் பின்னணி குரல், படத்தின் காலகட்டத்தைப் பார்வையாளர்களுக்கு அறிமுகப்படுத்துகிறது.
ஜேம்ஸ் காக்னி (எட்டி பார்ட்லெட்): குற்ற உலகில் நுழைந்து மாபெரும் சாம்ராஜ்யத்தை உருவாக்கும் தாதா! தான் நேசிக்கும் பெண் தனது நண்பனை காதலிக்கிறாள் என்பதை அறிந்து விலகுவதிலும், இறுதியில் அவளது குடும்பத்தைக் காப்பாற்றத் தன் உயிரையே பணயம் வைப்பதிலும் ஆன்டி ஹீரோவாகத் தொடங்கி, மனிதநேயமிக்க நாயகனாக உயர்கிறார்.
ஹம்ப்ரி போகார்ட் (ஜார்ஜ் ஹாலி): பணத்துக்காக எதையும் செய்யும் ஈவிரக்கமற்ற கொடூரன். முன்னாள் ராணுவ சார்ஜென்ட்டைக் கொல்வது, நண்பன் எட்டிக்கே துரோகம் செய்வது எனத் தனது மிரட்டலான நடிப்பால் அச்சுறுத்துகிறார்.
ஜெஃப்ரி லின் (லாயிட் ஹார்ட்): சூழ்நிலையால் குற்ற உலகில் சிக்கினாலும், வன்முறையைக் கண்டு வெளியேறுகிற நேர்மையான வழக்கறிஞர். இரு முரட்டு கேங்ஸ்டர்களுக்கு நேர்மாறான இவரது கதாபாத்திரம் படத்துக்குச் சரியான முரணையும் சமநிலையையும் தருகிறது.
பிரிசில்லா லேன் (ஜீன் ஷெர்மன்): போர்க்காலத்தில் முகம் தெரியாத ராணுவ வீரனுக்கு உற்சாக மூட்டக் கடிதம் எழுதும் இளம்பெண். பின்னர் நைட் கிளப் பாடகியாக உயர்கிறாள். கணவனைக் காப்பாற்ற நாயகனிடம் கெஞ்சும் காட்சிகளில் யதார்த்தமான நடிப்பை வெளிப்படுத்தியுள்ளார்.
கிளாடிஸ் ஜார்ஜ் (பனாமா): எட்டியின் வளர்ச்சிக்கும் வீழ்ச்சிக்கும் துணைநிற்கும் விசுவாசமான பெண். அவன்மீது கொண்ட அன்பை வெளிப்படுத்தாமல், மடிந்து விழும் அவனை மடியில் தாங்கிப் பிடிப்பதுவரை உணர்வுபூர்வமான நடிப்பை வெளிப்படுத்தியுள்ளார்.
முதல் உலகப்போர், மதுவிலக்கு, பங்குச்சந்தை வீழ்ச்சி என வரலாற்று நிகழ்வுகளை மூன்று மனிதர்களின் வாழ்வோடு இணைத்து, கேங்ஸ்டர் சாம்ராஜ்யத்தின் எழுச்சியையும் வீழ்ச்சியையும் தனது அசுரவேகத் திரைமொழியாலும் விறுவிறுப்பான காட்சியமைப்பாலும் நேர்த்தியாகப் பதிவு செய்துள்ளார் இயக்குநர் ரவுல் வால்ஷ்.
வரலாற்றைக் கதாபாத்திரங்களின் வாழ்க்கை வழியாக உணர்த்துவது, கதாநாயகனின் வீழ்ச்சிக்கு அவன் சார்ந்த குற்ற உலகத்தையே காரணமாக்குவது, வலுவான எதிர்நாயகனை உருவாக்குவது, குற்ற உலகப் பின்னணியில் காதலுக்கு இடமளிப்பது எனப் பல திரைக்கதை நுட்பங்களைக் கற்றுத் தருகிறது இப்படம். கதையின் மையக் கருத்தைத் தாங்கி நிற்கும் நேர்த்தியான முடிவுடன், திரைக்கதைப் பாடமாக விளங்கும் இத்திரைக்காவியத்துக்காக ஒரு பொன்மாலைப் பொழுதைத் தாராளமாக ஒதுக்கலாம்.
(செவ்வாய்தோறும் படம் பார்ப்போம்)