இந்தி நடிகர் ஷாருக்கான் தற்போது நடித்து வரும் திரைப்படம் ‘கிங்’. இதை ‘பதான்’ படத்தை இயக்கிய சித்தார்த் ஆனந்த் இயக்கி வருகிறார். இதில் அனில் கபூர், ராணி முகர்ஜி, தீபிகா படுகோன், சுஹானா கான், அபிஷேக் பச்சன் உள்பட பலர் நடிக்கின்றனர்.
இப்படத்துக்காக பாலைவனத்தில் அனில் கபூர், சுஹானா கான் பங்கேற்கும் ஆக் ஷன் காட்சியை படமாக்க இருந்தனர். ஏப்.9-ம் தேதி முதல், ஒரு வார காலம் அங்கு படப்பிடிப்பை நடத்த முடிவு செய்திருந்தனர். ஐக்கிய அரசு அமீரகம் அதற்கான அனுமதியை வழங்கி இருந்தது.
மத்திய கிழக்கில் நடந்து வரும் போர் பதற்றம் காரணமாக இப்போது அத்திட்டத்தை படக்குழு ரத்து செய்துவிட்டது. அக்காட்சிகளை மும்பையின் விலே பார்லே பகுதியில் செட் அமைத்து படமாக்க உள்ளதாக தெரிவித்துள்ளனர். இப்படம் டிச.24-ம் தேதி வெளியாக இருக்கிறது.