மும்பை: இந்திய பங்குச் சந்தைகளில் நேற்று கடும் சரிவு காணப்பட்டது. சென்செக்ஸ் 1,124 புள்ளிகள் சரிந்தன. இதனால் ஒரே நாளில் முதலீட்டாளர்களுக்கு சுமார் ரூ.9 லட்சம் கோடி இழப்பு ஏற்பட்டது.
கடந்த 7 வாரங்களாக இந்திய பங்குச் சந்தைகள் தொடர்ந்து சரிந்தன. நேற்று காலையிலும் இந்திய பங்குச் சந்தையின் அனைத்து குறியீடுகளும் சரிவுடன் தொடங்கின. குறிப்பாக, நிப்டி குறியீடு 23 ஆயிரம் என்ற ஆதரவை இழந்தது. வர்த்தக முடிவில் தேசிய பங்குச் சந்தை குறியீட்டெண் நிப்டி 360 புள்ளிகள் (1.56%) சரிந்து 22,780-ல் நிலை பெற்றது. சென்செக்ஸ் 1,124 புள்ளிகள் சரிந்து (1.52%) 72,772-ல் நிலை பெற்றது. இதன் மூலம் ஒரே நாளில் முதலீட்டாளர்களுக்கு சுமார் ரூ.8.9 லட்சம் கோடி இழப்பு ஏற்பட்டது. ரியல் எஸ்டேட், வங்கிகள், வாகனம், எப்எம்சிஜி, ஸ்மால்கேப், மிட்கேப் உள்ளிட்ட பெரும்பாலான துறை சார்ந்த குறியீடுகள் 2 சதவீதம் வரை சரிவை சந்தித்தன.
ஈரான் முன்வைத்த 7 நாள் போர் நிறுத்த திட்டத்தை அமெரிக்க அதிபர் ட்ரம்ப் நிராகரித்தார். இதனால் மத்திய கிழக்கு நாடுகளில் போர் பதற்றம் நீடிக்கிறது. கச்சா எண்ணெய் விலையும் நேற்று மீண்டும் உயரத் தொடங்கி உள்ளது. அமெரிக்க ரிசர்வ் வங்கி வட்டி விகிதத்தை உயர்த்தியதால் அந்நாட்டு பத்திரங்கள் மீதான வருவாய் அதிகரித்துள்ளது. ரூபாய் மதிப்பும் சரிந்து வருகிறது. இதுபோன்ற காரணங்களால் பங்குச் சந்தை் சரிவடைவதாக இத்துறை வல்லுநர்கள் தெரிவிக்கின்றனர்.