மும்பை: இந்திய பங்குச் சந்தைகள் நேற்று காலையில் கடும் சரிவுடன் தொடங்கின. ஒரு கட்டத்தில் சென்செக்ஸ் 1,100 புள்ளிகளுக்கு மேல் சரிந்தது. பின்னர் இந்திய பங்குச் சந்தைகள் சரிவிலிருந்து மீண்டன.
நேற்று வர்த்தக முடிவில் தேசிய பங்குச் சந்தை குறியீட்டெண் நிப்டி 198 புள்ளிகள் (0.88%) சரிந்து 22,422-ல் நிலை பெற்றது. இதுபோல மும்பை பங்குச் சந்தை குறியீட்டெண் சென்செக்ஸ் 571 புள்ளிகள் சரிந்து (0.79%) 71,910-ல் நிலை பெற்றது. இதன் மூலம் ஒரே நாளில் முதலீட்டாளர்களுக்கு சுமார் ரூ.5 லட்சம் கோடிக்கு மேல் இழப்பு ஏற்பட்டது.
வங்கிகள், வாகனம், எப்எம்சிஜி, ஸ்மால்கேப், மிட்கேப் உள்ளிட்ட அனைத்து துறை சார்ந்த நிப்டி குறியீடுகளும் சரிவை சந்தித்தன. எனினும், ஐ.டி. துறை குறியீடு மட்டும் 2.17% உயர்ந்தது.
செப்டம்பர் மாத வாகன விற்பனை கணிசமாக குறைந்ததால் இத்துறை சார்ந்த பங்குகள் அதிக வீழ்ச்சியை சந்தித்தன. பஜாஜ் ஆட்டோ பங்கு அதிகபட்சமாக 7.6% சரிந்தது.
கச்சா எண்ணெய் விலை மீண்டும் உயரத் தொடங்கியதே பங்குச் சந்தை சரிவுக்கு காரணமாக அமைந்தது. காந்தி ஜெயந்தியை முன்னிட்டு இன்று பங்குச் சந்தைகளுக்கு விடுமுறை ஆகும். எனவே, இந்த வாரமும் பங்குச் சந்தைகள் சரிவுடன் முடிந்தன.இதன் மூலம், 25 ஆண்டுக்குப் பிறகு இந்திய பங்குச் சந்தைகள் தொடர்ந்து 8-வது வாரமாக சரிவில் முடிந்துள்ளது.