மும்பை: மின்சார பயன்பாட்டுக்கு வேகமாக மாறினால் எரிபொருள் இறக்குமதிக்கான செலவு ஆண்டுக்கு ரூ.9.6 லட்சம் கோடி மிச்சம் ஆகும் என புதிய ஆய்வொன்றின் மூலம் தெரியவந்துள்ளது.
கிளைமேட் கம்பாட்டிபிள் ஃபியூச்சர்ஸ் என்ற ஆய்வு நிறுவனம், ‘புதைபடிவ எரிபொருள் இறக்குமதியிலிருந்து விடுபடுதல்: இந்தியாவுக்கான விரைவான மின்மயமாக்கல் திட்டம்’ என்ற பெயரில் ஒரு ஆய்வறிக்கையை நேற்று வெளியிட்டது. அதில் கூறப்பட்டுள்ளதாவது: பெட்ரோல், டீசல், இயற்கை எரிவாயு மற்றும் நிலக்கரி உள்ளிட்ட புதைபடிவ எரிபொருட்களின் இறக்குமதியை சார்ந்திருப்பதைக் குறைக்க, நாடு முழுவதும் மின்மயமாக்கலை விரைவுபடுத்த வேண்டும். இதனால், 2034-35-ம் நிதியாண்டுக்குள் இந்தியாவின் வருடாந்திர எரிபொருள் இறக்குமதிச் செலவை 40 சதவீதத்துக்கும் மேல் குறைக்க முடியும்.
அதேநேரம், தற்போதைய நிலையே தொடர்ந்தால் 2035-ம் நிதியாண்டில் எரிபொருள் இறக்குமதிச் செலவு ரூ.17 லட்சம் கோடியாக அதிகரிக்கும். மின்மயமாக்கலைத் தீவிரப்படுத்தினால் அது ரூ.7.4 லட்சம் கோடியாகக் குறையும். இதன் மூலம் ஆண்டுதோறும் ரூ.9.6 லட்சம் கோடி சேமிக்க முடியும். வழக்கமான போக்கு தொடர்ந்தால் 2044-45-ம் நிதியாண்டில் இந்தியாவின் எரிபொருள் இறக்குமதிச் செலவு ரூ.23.3 லட்சம் கோடியாக உயரும் என கணிக்கப்பட்டுள்ளது.
ஆனால், விரைவான மின்மயமாக்கல் மூலம் 2045-க்குள் நேரடி புதைபடிவ எரிபொருள் இறக்குமதியை முற்றிலும் பூஜ்ஜியத்துக்குக் கொண்டு வர முடியும் என்பது ஆய்வில் தெரியவந்துள்ளது. புதுப்பிக்கத்தக்க மின்சார உற்பத்தியைத் தாண்டி போக்குவரத்து, தொழில் துறை, விவசாயம் மற்றும் கட்டிடங்களின் ஆற்றல் நுகர்விலும் மின்சாரப் பயன்பாட்டை அதிகரிப்பதே இதற்கு சரியான தீர்வாகும்.
2045-ல் நேரடி இறக்குமதி பூஜ்ஜியமானாலும், தொழில் துறை நிலக்கரி மற்றும் விமானம், கப்பல் எரிபொருட்கள் போன்றவை மொத்த ஆற்றல் தேவையில் 8 சதவீதத்துக்கும் குறைவாகத் தொடர்ந்து பயன்படுத்தப்படும். ஆனால் அவை உள்நாட்டு உற்பத்தி மூலமே பூர்த்தி செய்யப்படும். இவ்வாறு அதில் கூறப்பட்டுள்ளது.