சென்னை: பல்வேறு நவீன மாற்றங்களுடன் கியா நிறுவனத்தின் புதிய ‘கியா செல்டோஸ்’ கார் அறிமுகம் செய்யப்பட்டுள்ளது. இதன் தொடக்க விலை ரூ.10.99 லட்சமாக நிர்ணயிக்கப்பட்டுள்ளது.
இந்திய கார் சந்தையில் தனக்கென தனி இடத்தைப் பிடித்துள்ள கியா மோட்டார்ஸ் நிறுவனம், நவீன மாற்றங்களுடன் கூடிய தனது 2-ம் தலைமுறை ‘ஆல் நியூ செல்டோஸ்’ காரை சென்னையில் நடைபெற்ற விழாவில் அதிகாரப்பூர்வமாக நேற்று அறிமுகப்படுத்தியது. கியா இந்தியா மண்டல விற்பனை பிரிவு மேலாளர் கவுரவ் குமார் மற்றும் விற்பனைப் பங்குதாரர்கள் முன்னிலையில் இந்த புதிய மாடல் கார் அறிமுகம் செய்யப்பட்டது.
இது முந்தைய மாடல்களை விட கூடுதல் வலிமை வாய்ந்த ‘குளோபல் கே3’ பிளாட்பார்மில் வடிவமைக்கப்பட்டுள்ளது. வாடிக்கையாளர்களின் எதிர்பார்ப்பைப் பூர்த்தி செய்யும் வகையில் இதன் நீளம் (4,460 மி.மீ), அகலம் (1,830 மி.மீ) மற்றும் வீல் பேஸ் (80 மி.மீ) ஆகியவை கணிசமாக அதிகரிக்கப்பட்டுள்ளன. குறிப்பாக, காரின் உட்புறத்தில் கால்களை வசதியாக வைப்பதற்கான இடவசதி மேம்படுத்தப்பட்டுள்ளதுடன், தரைக்கான இடைவெளி 200 மி.மீ ஆக உயர்த்தப்பட்டுள்ளது. இது கரடுமுரடான சாலையிலும் தடையின்றி பயணிக்கும்.
இதில் 31 இன்ச் ‘டிரினிட்டி பனோரமிக்’ திரை இடம்பெற்றுள்ளது. ஓட்டுநர் இருக்கையை 10 நிலைகளில் மாற்றியமைக்கும் வசதி, ரிவர்ஸ் எடுக்கும் போது தானாகவே இறங்கும் பக்கவாட்டு கண்ணாடிகள், பார்க்கிங் சென்சார்ஸ் மற்றும் போஸ் சவுண்ட் சிஸ்டம் என பல அம்சங்கள் சேர்க்கப்பட்டுள்ளன.
பாதுகாப்புக்கு அதிக முக்கியத்துவம் அளிக்கும் வகையில், ‘அடாஸ் லெவல்-2’ தொழில்நுட்பம், அனைத்து வேரியன்ட்களிலும் 6 ஏர்பேக்குகள், 24 வகை அடிப்படை பாதுகாப்பு அம்சங்களும் வழங்கப்பட்டுள்ளன.
வழக்கமான பெட்ரோல், டீசல் மற்றும் டர்போ இன்ஜின் தேர்வுகளுடன், 10 நிறத்தில் அறி முகமாகியுள்ள இதன் தொடக்க விலை ரூ.10.99 லட்சமாகும்.