புதுடெல்லி: 2026-27-ம் நிதியாண்டில் இந்தியாவின் ஒட்டு மொத்த உள்நாட்டு உற்பத்தி (ஜிடிபி) வளர்ச்சி 7 சதவீதமாக இருக்கும் என்று மூடிஸ் ரேட்டிங்ஸ் நிறுவனம் கணித்துள்ளது. மூடிஸ் ரேட்டிங்ஸ் நிறுவனம் என்பது உலகளவில் மிக முக்கியமான கடன் தர மதிப்பீட்டு நிறுவனம் (கிரெடிட் ரேட்டிங் ஏஜென்சி) ஆகும். இது நிறுவனங்கள், வங்கிகள் மற்றும் நாடுகள் வாங்கும் கடனைத் திருப்பிச் செலுத்தும் திறன் அவற்றுக்கு எவ்வளவு இருக்கிறது என்பதை ஆய்வு செய்து, அதற்கேற்ப தரவரிசையை வழங்கும்.
இந்நிலையில் இந்த மூடிஸ் நிறுவனம் இந்தியாவின் ஜிடிபி வளர்ச்சியானது 2026-27-ம் நிதியாண்டில் 7 சதவீதமாக இருக்கும் என்று கணித்துள்ளது. முன்னதாக இந்தியாவின் ஜிடிபி வளர்ச்சியானது 6 சதவீதமாக இருக்கும் என்று மூடிஸ் கூறி வந்த நிலையில், தனது நிலையை மாற்றிக் கொண்டு ஜிடிபி வளர்ச்சி 7 சதவீதமாக இருக்கும் என்று உயர்த்தியுள்ளது.
மேலும், 2026-ம் ஆண்டின் முதல் ஆறு மாதங்களில் இந்தியாவின் உண்மையான ஜிடிபி வளர்ச்சி ஆண்டுக்கு ஆண்டு அடிப்படையில் 8.2 சதவீதமாக அதிகரித்துள்ளதாக மூடிஸ் தெரிவித்துள்ளது. மற்ற அனைத்து ஜி20 நாடுகளின் பொருளாதார வளர்ச்சியை விடவும் இந்தியாவின் பொருளாதாரம் வேகமாக வளரும் என்று எதிர்பார்ப்பதாக மூடிஸ் தெரிவித்துள்ளது.
மத்திய கிழக்குப் பகுதியில் நிலவும் மோதல்களுக்கு மத்தியிலும் உலகளாவிய அதிர்வுகளைத் தாங்கும் திறனை இந்தியப் பொருளாதாரம் வெளிப்படுத்தியுள்ளதாகவும் மூடிஸ் ரேட்டிங்ஸ் தெரிவித்துள்ளது. அதேநேரத்தில், உயர்ந்த கச்சா எண்ணெய் விலை மற்றும் எல் நினோ தாக்கத்தால் பணவீக்கம் தொடர்பான அபாயங்கள் இருப்பதையும் மூடிஸ் சுட்டிக்காட்டியுள்ளது.
ஜிடிபி வளர்ச்சிக்கு கச்சா எண்ணெய் இறக்குமதிக்கான ஆதாரங்களை இந்தியா பன்முகப்படுத்தியிருப்பது, கணிசமான அந்நியச் செலாவணி கையிருப்பு மற்றும் வலுவான உள்நாட்டுத் தேவை ஆகியவை முக்கிய பாதுகாப்புக் காரணிகளாக அமைந்துள்ளது என்றும் மூடிஸ் தெரிவித்துள்ளது.
இந்தியப் பொருளாதாரம் 2026-27-ம் நிதியாண்டின் ஜூன் வரை முடிந்த காலாண்டில் 7.8 சதவீத வளர்ச்சியைப் பதிவு செய்தது. இது இந்திய ரிசர்வ் வங்கி கணித்த 7 சதவீத ஜிடிபி வளர்ச்சியை விட அதிகம் என்பது குறிப்பிடத்தக்கது.