புதுடெல்லி: போர்ப்ஸ் நிறுவனம் வெளியிட்டுள்ள 40 வயதுக்கு உட்பட்ட 40 இளம் கோடீஸ்வரர்கள் பட்டியலில் இந்தியாவின் நிகில் காமத் இடம்பிடித்துள்ளார்.
இளம் நிறுவனர்கள், தொழில் நுட்பம் மற்றும் புதுமைகளின் மூலம் எவ்வாறு பெரும் செல்வத்தை உருவாக்குகிறார்கள் என்பதை எடுத்துக்காட்டும் வகையில் 40 வயதுக்கு உட்பட்ட 40 இளம் கோடீஸ்வரர் பட்டியலை போர்ப்ஸ் நிறுவனம் தயாரித்துள்ளது.
இதில், இந்தியாவிலிருந்து 39 வயதான ஸெரோதா இணை நிறுவனரும் தலைமை நிதி அதிகாரியுமான நிகில் காமத் 3.3 பில்லியன் டாலர் நிகர சொத்து மதிப்புடன் பட்டியலில் 20-ஆவது இடத்தை பிடித்துள்ளார். நிகில் காமத்துடன் சேர்த்து மொத்தம் இந்த பட்டியலில் 4 இந்திய வம்சாவளி தொழில் முனைவோர்கள் இடம் பெற்றுள்ளனர்.
இவர்களின் ஒட்டுமொத்த சொத்து மதிப்பு 11 பில்லியன் டாலர் ஆகும். இருப்பினும், இந்தியாவிலிருந்து இந்த பட்டியலில் இடம்பிடித்தது நிகில் காமத் மட்டுமே. இவரை தவிர, நியூயார்க்கை சேர்ந்த இந்திய வம்சாவளி ஆங்கூர் ஜெயின் 3.4 பில்லியன் டாலர் நிகர சொத்து மதிப்புடன் போர்ப்ஸ் பட்டியலில் 19- வது இடத்தில் உள்ளார்.
இவருக்கு வயது 35. பில்ட் ரிவார்ட்ஸ் நிறுவனத்தின் சிஇஓ மற்றும் நிறுவனராக ஆங்குர் ஜெயின் உள்ளார். இவர்களை தவிர ஆதர்ஷ் ஹிரேமத் மற்றும் சூர்யா மிதா (இருவருக்கும் வயது 22) ஆகிய இருவரும் ஒன்றாக 27-வது இடத்தைப் பிடித்துள்ளனர். இவர்கள் ஏஐ அடிப்படையிலான ஆட்சேர்ப்பு ஸ்டார்ட்அப்பான மெர்கோர் நிறுவனத்தின் இணை நிறுவனர்களாவர். இவர்களின் நிகர சொத்து மதிப்பு என்பது தலா ரூ.1,826 கோடி என்பது குறிப்பிடத்தக்கது.
ஆதர்ஷ் ஹிரேமத் பே ஏரியாவில் வளர்ந்து, கணினி அறிவியலில் இளங்கலை மற்றும் முதுகலைப் பட்டங்களை ஒருங்கிணைந்து பெற்றவர். சூர்யா மிதா மவுண்டன் வியூவில் பிறந்து தனது குழந்தைப் பருவத்தை சான் ஜோஸில் கழித்தார். அவர் ஜார்ஜ்டவுன் பல்கலைக்கழகத்தில் இளங் கலைப் பட்டம் பெற்றவர்.