புதுடெல்லி: கடந்த டிசம்பரில் மொத்த ஜிஎஸ்டி வசூல் ரூ.1.74 லட்சம் கோடியை எட்டியுள்ளது. இது, 2024 டிசம்பர் ஜிஎஸ்டி வசூலான ரூ.1.64 லட்சம் கோடியுடன் ஒப்பிடுகையில் 6.1% மட்டுமே அதிகம். வரி குறைப்பை அடுத்து உள்நாட்டு விற்பனை மூலம் கிடைக்கும் வருவாய் வளர்ச்சி வேகம் குறைந்துள்ளது.
அதன்படி, உள்நாட்டு பரிவர்த்தனைகளின் மூலமாக கிடைத்த மொத்த வருவாய் 1.2% மட்டுமே உயர்ந்து ரூ.1.22 லட்சம் கோடியாக மட்டுமே இருந்தது. அதேநேரம், இறக்குமதி பொருட்கள் மூலமாக கிடைத்த வரி வருவாய் 19.7% அதிகரித்து ரூ.51,977 கோடியாக இருந்தது.
இதையடுத்து டிசம்பரில் நிகர ஜிஎஸ்டி வருவாய் 2.2% மட்டுமே உயர்ந்து ரூ.1.45 லட்சம் கோடியாக இருந்தது என்று மத்திய அரசு நேற்று வெளியிட்ட புள்ளி விவரத்தில் தெரிவித்துள்ளது.