டிஜிட்டல் கில்லாடி ஆகலாம்! - 18: நவீன தொழில்நுட்பத்தின் பயன்

நாம் இதுவரை நவீன தொழில்நுட்பத்திற்கு தேவையான அடிப்படைகளை பற்றி பார்த்தோம். இப்போது நவீன தொழில்நுட்பத்தின் முக்கிய பயனை தெரிந்து கொள்வோம். அதற்கு நாம் இதுவரை பார்த்த மின்விசிறி ரெகுலேட்டர் உதாரணத்தையே இதற்கும் எடுத்துக் கொள்வோம். படம் 1-ல் 230 வோல்ட் மின்னழுத்தத்தை நேரடியாக மின்விசிறிக்கு அளித்திருக்கிறோம்.

அதன் காரணமாக மின்விசிறி ஒரு குறிப்பிட்ட சீரான வேகத்தில் சுற்றும். உதாரணமாக மின்விசிறியின் சக்தி 230 வாட்ஸ் என்று வைத்துக் கொண்டால் மின்விசிறியின் ஊடே செல்லும் மின்னோட்டத்தின் அளவு 1A (230W/230V). நாம் ஏற்கெனவே படித்த படி மின்விசிறியின் மின்தடை மாறாது. மின்விசிறிக்கு தரும் மின்னழுத்தம் 230V, அதன் ஊடே செல்லும் மின்னோட்டம் 1A. ஆகவே மின்விசிறியின் மின்தடை 230 (230V/1A).