குறைந்த புகை வரும் ‘பிஎஸ்-6’ எரிபொருள் விற்பனை தொடக்கம்

இந்தியன் ஆயில் நிறுவன அதிகாரிகள் நேற்று கூறியதாவது:

வாகனங்களால் ஏற்படும் காற்று மாசுவை கட்டுப்படுத்துவதற்காக, வரும் ஏப்.1-ம் தேதி முதல் பிஎஸ்-6 ரக வாகனங்களை மட்டுமே விற்பனை செய்ய வேண்டும் என்று மத்திய அரசு உத்தரவிட்டுள்ளது. அந்த வாகனங்களின் இன்ஜின்களில் பயன்படுத்து வதற்காக, பிஎஸ்-6 தர எரிபொருள்களை வரும் ஏப்ரல் முதல் கட்டாயம் விற்பனை செய்யுமாறு எண்ணெய் நிறுவனங்களுக்கும் அரசு உத்தரவிட்டுள்ளது.

இதையடுத்து, இந்தியன் ஆயில் நிறுவனம் பிஎஸ்-6 எரிபொருள் விற்பனையைத் தொடங்கி விட்டது. இந்தியன் ஆயில் நிறுவனம் தனது 2,300 பெட்ரோல் பங்க்குகளில் இந்த பிஎஸ்-6 எரிபொருள் விற்பனையைத் தொடங்கியுள்ளது.

இந்த பிஎஸ்-6 எரிபொருளில் சல்பர் அளவு 50 பிபிஎம் என்ற அளவில் இருந்து 10 பிபிஎம் என்ற அளவாக குறைக்கப்படும். இதன்மூலம், வாகனங்களில் இருந்து குறைந்த அளவு மட்டுமே புகை வெளியேறும்.

இவ்வாறு அதிகாரிகள் கூறினர்.