மண்டைக்காடு பகவதியம்மன் கோயில் மாசிக் கொடை விழா 28-ல் தொடக்கம்

கன்னியாகுமரி மாவட்டத்தில் பெண்களின் சபரிமலை என போற்றப்படும் மண்டைக்காடு பகவதியம்மன் கோயில் மாசிக் கொடை விழா வரும் 28-ம் தேதி தொடங்கி, மார்ச் 9-ம் தேதி வரை நடைபெறுகிறது.

28-ம் தேதி காலை 7.30 மணியில் இருந்து 8.30 மணிக்குள் திருக்கொடி ஏற்றப்படுகிறது. அதைத்தொடர்ந்து நடைபெறும் சமய மாநாட்டை தெலங்கானா ஆளுநர் தமிழிசை சவுந்தரராஜன் குத்துவிளக்கேற்றி தொடங்கி வைக்கிறார். மதியம் 12.30 மணிக்கு உச்சிகால பூஜை, இரவு 7 மணிக்கு திருவிளக்கு பூஜை, இரவு 9 மணிக்கு அத்தாள பூஜை நடைபெறுகிறது.

2-ம் நாள் விழாவான மார்ச் 1-ம் தேதி காலை 10 மணிக்கு மகாபாரத தொடர் சொற்பொழிவு, இரவு 8 மணிக்கு இன்னிசை நடைபெறுகிறது.

3-ம் நாள் திருவிழாவான 2-ம் தேதி முதல் 8-ம் தேதி வரை காலை 9.30 மணி, இரவு 9.30 மணி ஆகிய வேளைகளில் பகவதியம்மன் வெள்ளிப்பல்லக்கில் பவனி, மாலை 5 மணிக்கு பரத நாட்டியம், இரவு 9 மணிக்கு கதகளி ஆகியவை நடைபெறுகிறது.

மார்ச் 8-ம் தேதி இரவு 9.30 மணிக்கு பெரிய சக்கர தீவட்டியுடன் அம்மன் வெள்ளி பல்லக்கில் பவனி நடைபெறுகிறது.

விழா நிறைவு நாளான 9-ம் தேதி அதிகாலை 2 மணிக்கு கண்டன் சாஸ்தா கோயிலில் இருந்து களப பவனி, 3.30 மணிக்கு அம்மன் வெள்ளி பல்லக்கில் பவனி ஆகியவை நடைபெறுகிறது. பகல் 12 மணிக்கு குத்தியோட்டம், நள்ளிரவு 12 மணிக்கு பாரம்பரிய ஒடுக்கு பூஜை, தீபாராதனை நடைபெறுகிறது.