ஓமலூர்- மேச்சேரி இடையே நாளை அதிவேக ரயில் சோதனை ஓட்டம்

சேலம்: ஓமலூர்- மேச்சேரி இடையிலான புதிய ரயில் பாதையில் நாளை (25-ம் தேதி) அதிவேக ரயில் இயக்கப்பட்டு சோதனை நடத்தப்பட உள்ளது.

சேலம் ரயில்வே கோட்டத்தில் சேலம்-மேட்டூர் அணை இடையிலான ரயில் பாதையில், ஓமலூர்- மேச்சேரி இடையே புதிதாக 2-வது அகலப்பாதை அமைக்கப்பட்டுள்ளது. இப்பாதையில் பாதுகாப்பு அம்சங்கள் தொடர்பாக தெற்கு வட்ட ரயில்வே பாதுகாப்பு ஆணையர் அபய்குமார் ராய், நாளை ஆய்வு செய்கிறார். அப்போது, ஓமலூர்-மேச்சேரி இடையே நாளை மதியம் 2 மணி முதல் மாலை 5 மணி வரை அதிவேகத்தில் ரயில் இயக்கப்பட்டு சோதனை ஓட்டம் நடத்தப்பட உள்ளது. எனவே, ரயில் பாதையோரம் வசிக்கும் பொதுமக்கள் யாரும் ரயில் பாதை மற்றும் பாதையின் அருகே நடமாட வேண்டாம் என சேலம் ரயில்வே கோட்ட நிர்வாகம் எச்சரித்துள்ளது.