ரங்கம் ரங்கநாதர் கோயிலில் - டிச.3 முதல் வைகுண்ட ஏகாதசி விழா : சொர்க்கவாசல் டிச.14-ம் தேதி திறப்பு

ரங்கம் ரங்கநாதர் கோயிலில் வைகுண்ட ஏகாதசி பெருவிழா டிச.3-ம் தேதி தொடங்கி 24-ம்தேதி வரை விமரிசையாக நடைபெறவுள்ளது.

‘பூலோக வைகுண்டம்’ எனப் போற்றப்படும் ரங்கம் ரங்கநாதர் கோயிலில் ஆண்டு முழுவதும் உற்சவங்கள் நடைபெற்றாலும் ‘திருஅத்யயன உற்சவம்’ எனப்படும் வைகுண்ட ஏகாதசி பெரு விழா சிறப்பு வாய்ந்தது.

இந்த ஆண்டு இவ்விழா டிச.3-ம் தேதி திருநெடுந்தாண்டகத்துடன் தொடங்குகிறது. டிச.4-ம்தேதி பகல்பத்து (திருமொழி திருநாள்) தொடங்குகிறது. 12-ம்தேதி வரை தினந்தோறும் நம்பெருமாள் மூலஸ்தானத்திலிருந்து புறப்பட்டு அர்ச்சுன மண்டபத்தில் எழுந்தருளி பக்தர்களுக்கு சேவை சாதிப்பார். பகல் பத்து திருநாளில் முக்கிய நிகழ்ச்சியான மோகினி அலங்காரம் டிச.13-ம் தேதி நடை பெறவுள்ளது.

வைகுண்ட ஏகாதசி பெருவிழாவின் முக்கிய நிகழ்ச்சியான சொர்க்கவாசல் திறப்பு டிச.14-ம் தேதி அதிகாலை 4.30 மணிக்கு நடைபெறவுள்ளது. அன்றைய தினம் முதல் ராப்பத்து திருநாள் (திருவாய்மொழித் திருநாள்) தொடங்குகிறது.

தொடர்ந்து டிச.20-ம் தேதி திருக்கைத்தல சேவை, 21-ம் தேதி திருமங்கைமன்னன் வேடுபறி, 23-ம் தேதி தீர்த்தவாரி, 24-ம் தேதி நம்மாழ்வார் மோட்சம் மற்றும் இயற்பா சாற்றுமுறை ஆகியவை நடைபெறவுள்ளன.

இந்த விழாவுக்கான முன்னேற்பாடுகளை கோயில் இணை ஆணையர் செ.மாரிமுத்து மற்றும் கோயில் ஊழியர்கள் செய்து வருகின்றனர்.