ராஜஸ்தான் 185 ரன்கள் குவிப்பு :

ஐபிஎல் டி 20 தொடரில் நேற்று முன்தினம் நடைபெற்ற ஆட்டத்தில் பெங்களூரு அணியை 9 விக்கெட்கள் வித்தியாசத்தில் வீழ்த்தியது கொல்கத்தா அணி. 93 ரன்கள் இலக்கை விரட்டிய கொல்கத்தா 10 ஓவர்களில் ஒரு விக்கெட்டை மட்டும் இழந்து வெற்றி பெற்றது.

இந்நிலையில் துபாயில் நேற்றுநடைபெற்ற ஆட்டத்தில் ராஜஸ்தான் ராயல்ஸ் - பஞ்சாப் கிங்ஸ் அணிகள் மோதின. முதலில் பேட் செய்த ராஜஸ்தான் 20 ஓவர்களில் 185 ரன்கள் குவித்து அனைத்து விக்கெட்களையும் இழந்தது. எவின் லீவிஸ் 21 பந்துகளில், ஒரு சிக்ஸர், 7 பவுண்டரிகளுடன் 36 ரன்கள் விளாசி அர்ஷ்தீப் சிங் பந்தில் ஆட்டமிழந்தார். கேப்டன் சஞ்சு சாம்சன் 4 ரன்களில் இஷான் பொரேல் பந்தில் ஆட்டமிழந்தார்.

அதிரடியாக விளையாடிய யஷஸ்வி ஜெய்ஸ்வால் 36 பந்துகளில், 2 சிக்ஸர்கள், 6 பவுண்டரிகளுடன் 49 ரன்களும், மஹிபால் லாம்ரோர் 17 பந்துகளில், 4 சிக்ஸர்கள், 2 பவுண்டரிகளுடன் 43 ரன்களும் விளாசி ஆட்டமிழந்தனர். லியாம் லிவிங்ஸ்டன் 17, ரியான் பராக் 4, ராகுல் டிவாட்டியா 2, கிறிஸ்மோரிஸ் 5, சேத்தன் சக்காரியா 7, கார்த்திக் தியாகி 1 ரன்களில் வெளியேறினர்.

ஒரு கட்டத்தில் ராஜஸ்தான் 16 ஓவர்களில் 4 விக்கெட்கள் இழப்புக்கு 164 ரன்கள் குவித்திருந்தது. ஆனால் கடைசி 4 ஓவர்களையும் கட்டுக்கோப்பாக வீசி ரன் குவிப்பை கட்டுப்படுத்தினர் பஞ்சாப் பந்து வீச்சாளர்கள். அந்த அணி சார்பில் அர்ஷ்தீப் சிங் 5, மொகமது ஷமி 3 விக்கெட்கள் வீழ்த்தினர். இதைத் தொடர்ந்து 186 ரன்கள் இலக்குடன் பஞ்சாப் அணி பேட்டிங்கை தொடங்கியது.

ஆப்கனில் தடை

ஐபிஎல் டி 20 கிரிக்கெட் போட்டிகளை ஆப்கானிஸ்தானில் ஒளிபரப்ப தடை விதித்து ஊடகங்களுக்கு எச்சரிக்கை விடுத்துள்ள னர் தலிபான்கள்.