புதுவையிலும் பால் விலை உயர்வு: லிட்டருக்கு ரூ.6 உயர்த்தி முதல்வர் நாராயணசாமி அறிவிப்பு

புதுச்சேரி

தமிழகத்தைத் தொடர்ந்து புதுச்சேரியிலும் பால் விலை லிட்டருக்கு ரூபாய் 6 உயர்த்தப்பட்டுள்ளது.

தமிழகத்தில் கடந்த சில தினங்களுக்கு முன்பு பால் விலை உயர்த்தப்பட்ட நிலையில் புதுச்சேரியில் உள்ள பால் உற்பத்தியாளர்கள் கொள்முதல் வரியை உயர்த்தி வழங்கக் கோரி முதல்வர் நாராயணசாமியிடம் கோரிக்கை வைத்தனர்.

இந்நிலையில் இன்று (ஆக.29) சட்டப்பேரவை பட்ஜெட் கூட்டத்தொடரின் 4-வது நாள் கூட்டம் நடைபெற்றது. அப்போது புதுச்சேரியில் பால் விலை உயர்த்தப்படுவது தொடர்பாக பேரவையில் முதல்வர் நாராயணசாமி அறிவிப்பை வெளியிட்டார்.

அப்போது பேசிய அவர், புதுச்சேரி அரசின் பாண்லே நிறுவனம் மூலம் விற்பனை செய்யப்படும் பால் விலை லிட்டருக்கு ரூபாய் 6 உயர்த்தப்படுவதாக அறிவித்தார். அதாவது சமன்படுத்திய பால் லிட்டர் ரூபாய் 36-ல் இருந்து ரூபாய் 42ஆகவும், சிறப்பு சமன்படுத்திய பால் லிட்டருக்கு ரூபாய் 38-ல் இருந்து ரூபாய் 44ஆக உயர்த்தப்பட்டதாகவும் இதேபோல் நிலைப்படுத்திய பால் ரூபாய் 42-ல் இருந்து ரூபாய் 48 ஆக உயர்த்தப்பட்டதாகவும் அறிவித்தார்.

மேலும் பால் கொள்முதல் விலை லிட்டர் ஒன்றுக்கு ரூபாய் 4 உயர்த்தி அதாவது ரூபாய் 30-ல் இருந்து ருபாய் 34 ஆக உயர்த்தி வழங்கப்படும் எனவும் அறிவித்தார். இந்த பால் விலை உயர்வு நாளை முதல் அமலுக்கு வருவதாகவும் முதல்வர் நாராயணசாமி அறிவித்தார்.

செ.ஞானபிரகாஷ்