திமுக பிரமுகருக்கு அரிவாள் வெட்டு

திருவள்ளூர் மாவட்டம், ஆவடி அருகேயுள்ள பட்டாபிராமை அடுத்த தண்டுரை வள்ளலார் நகரைச் சேர்ந்தவர் தாஸ் (52). திமுகவின் ஆவடி பகுதி 41-வது வட்டச் செயலராக உள்ளார்.

ரியல் எஸ்டேட் தொழில் செய்து வரும் தாஸ், நேற்று அதிகாலை வள்ளலார் நகர் பிரதான சாலைப் பகுதியில் ‘சைக்கிளிங்’ சென்றுவிட்டு, வீடு திரும்பிக் கொண்டிருந்தார். அப்போது, முகத்தை துணியால் மூடியவாறு வந்த 3 பேர், தாஸை வழிமறித்து, அரிவாளால் வெட்டிவிட்டு தப்பியோடிவிட்டனர்.

பலத்த காயங்களுடன் சரிந்து விழுந்த தாஸை, பட்டாபிராம் போலீஸார் வந்து மீட்டு சென்னை, கீழ்ப்பாக்கம் அரசு மருத்துவக் கல்லூரி மருத்துவமனையில் சேர்த்தனர். இந்தக் கொலை முயற்சி தொடர்பாக போலீஸார் விசாரணையைத் தீவிரப்படுத்தியுள்ளனர்.