சினிமா ரசனை 2.0 - 8: துருவங்கள் மாறலாம்!

மிக விறுவிறுப்பான ஓர் இணையத் தொடரைப் பெண்களே முதன்மைத் திரைக்கதை எழுத்தாளர்களாக இருந்து எழுதினால் எப்படி இருக்கும்? ‘வில்லனெல்’ (Villanelle) என்கிற பெண் கதாபாத்திரத்தை முன்வைத்து நான்கு குறுநாவல்களை 2014 முதல் 2016 வரை லூக் ஜென்னிங்ஸ் என்கிற எழுத்தாளர் எழுதி வெளியிட்டார். பின்னர், இந்த நான்கு குறுநாவல்களையும் ஒன்று சேர்த்து ஒரு மின்புத்தகம் வெளியிடப்பட்டது. அதுதான் ‘கில்லிங் ஈவ்’ ‘Killing Eve’ என்கிற, நாம் இங்கே அலசப்போகிற சீரீஸுக்கு அடிப்படையாக அமைந்த புத்தகம். அதை வைத்துக்கொண்டு மொத்தம் நான்கு சீசன் கள் எழுதப்பட்டு வெளியான சீரீஸ் இது.

வில்லனெல் என்பவள் 24 வயது மதிக்கத்தக்க ஒரு கொலையாளி. அதிலும் மிகச்சிறப்பான கொலையாளி. அவளிடம் யார், என்ன என்று சொல்லிவிட்டால் போதும். கச்சிதமாகக் கதையை முடித்து விடுவாள். இதனால் ‘The Twelve’ என்கிற அமைப்பிடம் வேலைக்குச் சேர்ந்து, அவர்கள் சொல்லும் ஆட்களைக் கொலை செய்துவருகிறாள்.