சென்னை சூப்பர் கிங்ஸ் பேட்டிங் பயிற்சியாளராக மைக் ஹஸ்ஸி நியமனம்

முன்னாள் ஆஸ்திரேலிய பேட்ஸ்மெனும், சென்னை சூப்பர் கிங்ஸ் வீரருமான மைக் ஹஸ்ஸி, சிஎஸ்கே அணியின் பேட்டிங் பயிற்சியாளராக அறிவிக்கப்பட்டுள்ளார்.

சென்னை சூப்பர் கிங்ஸ் அணியுடன் 2008 முதல் 2013 வரை பங்காற்றிய வீரர் மைக் ஹஸ்ஸி. மைக் ஹஸ்ஸி 64 போட்டிகளில் 2213 ரன்களுடன் (சராசரி 40.98) சென்னை சூப்பர் கிங்ஸ் அணியில் அதிக ரன்கள் எடுத்த 3-வது வீரராவார். 2013 ஐபிஎல் கிரிக்கெட்டில் அதிக ரன் எடுத்ததற்கான ஆரஞ்சு தொப்பி வென்றவர் மைக் ஹஸ்ஸி.

இது தொடர்பாக மைக் ஹஸ்ஸி கூறியதாவது:

சென்னை சூப்பர் கிங்ஸ் அணியின் பயிற்சியாளராகத் திரும்பியது எனக்கு மகிழ்ச்சியையும் உற்சாகத்தையும் அளிக்கிறது. சென்னை அணிக்காக ஒரு வீரராக எனக்கு நிறைய மலரும் நினைவுகள் உள்ளன. சென்னையில் அபாரமான நண்பர்களைச் சம்பாதித்துள்ளேன். அடுத்த தலைமுறை சிஎஸ்கே வீரர்களைத் தயார்படுத்துவதில் மகிழ்ச்சி.

ஐபிஎல்-ல் மீண்டும் சென்னை அணி வந்துள்ளது உற்சாகமாக உள்ளது. நிச்சயம் சென்னை ரசிகர்களும் தங்கள் அணி மீண்டும் வந்ததற்கு உற்சாகமாகவே இருப்பார்கள்.

இவ்வாறு கூறினார் மைக் ஹஸ்ஸி.