2017: மறக்க முடியுமா? - விளையாட்டு

rojer federer and rafel nadal100rightடென்னிஸ் ராஜாக்கள்

டென்னிஸில் 30 வயதைக் கடந்தால் ஒதுங்கும் வீரர்களுக்கு மத்தியில், இரண்டு வீரர்கள் விஸ்வரூபம் காட்டினார்கள். அவர்கள், சுவிட்சர்லாந்தின் ரோஜர் ஃபெடரர் (36 வயது), ஸ்பெயினின் ரபேல் நடால் (31 வயது). முக்கிய கிராண்ட்ஸ்லாம் பட்டங்களை இவர்கள் இருவருமே பங்கிட்டுக்கொண்டார்கள். ரோஜர் ஃபெடரர் ஆஸ்திரேலிய ஓபன், விம்பிள்டன் ஓபனை வசமாக்கினார். ரபேல் நடால் பிரெஞ்சு ஓபன், அமெரிக்க ஓபன் பட்டங்களைத் தனதாக்கினார்.

ஓய்ந்த கால்கள்

உலகின் புகழ்பெற்ற தடகள வீரர் உசைன் போல்ட் லண்டனில் இந்த ஆண்டு ஆகஸ்ட் மாதம் நடைபெற்ற உலக சாம்பியன்ஷிப் போட்டியோடு ஓய்வுபெற்றார். யாரும் வெற்றிகொள்ள முடியாத மின்னல்வேக ஓட்ட மனிதர் என்ற அறியப்பட்ட உசைன் போல், கடைசியாகப் பங்கேற்ற 100 மீட்டர், 4*400 மீட்டர் பந்தயங்களில் தோற்றது அவரது ரசிகர்களை அதிர்ச்சியடைய செய்தது. ஆனால், தடகளத்தில் 19 சர்வதேச, ஒலிம்பிக் தங்கப் பதக்கங்களை வென்றவர் என்ற பெருமையுடன் ஓய்வுபெற்றார்.

ashwinகிரிக்கெட்டின் இருவர்

இந்திய டெஸ்ட் கிரிக்கெட் அணியின் சுழல் மன்னரான அஸ்வின், குறைந்த (54 போட்டிகள்) டெஸ்ட் போட்டிகளில் 300 விக்கெட்டுகளைக் கடந்தவர் என்ற சாதனையைச் சொந்தமாக்கினார். நவ.27ல் இலங்கைக்கு எதிராக நாக்பூரில் நடந்த டெஸ்டில் இந்தச் சாதனையைப் படைத்தார். 56 டெஸ்ட் போட்டிகளில் ஆஸ்திரேலியாவின் டென்னிஸ் லில்லி செய்திருந்த இந்தச் சாதனையைத் தரைமட்டமாக்கினார் அஸ்வின்.

கேப்டனாக ஆறு இரட்டைச் சதங்கள் அடித்தவர், இந்த ஆண்டு 11 சதங்களைக் கடந்தவர், தொடர்ச்சியாக 9 டெஸ்ட் தொடர்களை வென்றுகாட்டியவர் என இந்த ஆண்டு விராட் கோலி காட்டில் வெற்றி மழைதான். ரன் மெஷினாக மாறி இந்த ஆண்டில் மட்டும் அனைத்து வடிவ சர்வதேச கிரிக்கெட் போட்டிகளிலும் 2,818 ரன் விளாசியிருக்கிறார். சர்வதேசப் போட்டிகளில் 50 சர்வதேச சதங்களையும் இந்த ஆண்டு கடந்தார் கோலி.

pv sindhu100rightபாட்மிண்டன் சூறாவளிகள்

இந்திய பாட்மிண்டனின் வெற்றிப் பயணம் இந்த ஆண்டும் தொடர்ந்தது. பிவி. சிந்து, உலக சாம்பியன்ஷிப் (ஆக. 7) தொடரில் வெள்ளிப்பதக்கம், இந்திய ஓபன், கொரியன் ஓபனில் தங்கம் என தொடர்ந்து சர்வதேச பாட்மிண்டன் தொடர்களில் வெற்றிக்கொடி நாட்டினார். உலக பாட்மிண்டன் தரவரிசையில் இரண்டாமிடத்துக்கு முன்னேறினார் பி.வி. சிந்து.

இதேபோல ஆடவர் பிரிவில் கிடாம்பி ஸ்ரீகாந்த் இந்தோனேஷிய ஓபன், ஆஸ்திரேலிய ஓபன், டென்மார்க் ஓபன், பிரெஞ்சு ஓபன் என சூப்பர் சீரிஸ் பட்டங்களை வென்று உலகின் தரமான பாட்மிண்டன் வீரர்களில் ஒருவராக மாறினார் ஸ்ரீகாந்த். மற்றொரு வீரரான பிரனாய் குமார் இந்தோனேஷிய ஓபன், வியட்நாம் ஓபன் தொடர்களில் பட்டம் வென்று அசத்தினார்

புது அவதாரம்

இந்த ஆண்டு தமிழக விளையாட்டு வீரர் ஒருவரின் தனிப்பட்ட சாதனையாகப் புதுக்கோட்டையைச் சேர்ந்த லட்சுமணனின் வெற்றியை ஆராதிக்கலாம். புவனேஸ்வரில் ஜூலை 6-ல் நடைபெற்ற ஆசிய தடகளப் போட்டி 5 ஆயிரம் மீட்டர் ஓட்டப் போட்டியில் லட்சுமணன் தங்கம் வென்றார்.

மிகவும் பின்தங்கிய, ஏழ்மையான குடும்பத்தைச் சேர்ந்த இவர், இளம் வயதிலிருந்தே வெறுங்காலில் புதுக்கோட்டை சாலைகளில் ஓடி பயிற்சி பெற்றவர்.