இந்தூரில் 5 பேருக்கு கரோனா ‘பாசிட்டிவ்’ உறுதி: மத்தியப் பிரதேச பாதிப்பு எண்ணிக்கை 14 ஆக அதிகரிப்பு

மத்தியப் பிரதேசத்தின் இந்தூரில் மேலும் 5 பேர் கரோனா தொற்று சோதனையில் பாசிட்டிவ் என்று தெரிந்ததனால் வெவ்வேறு மருத்துவமனைகளில் அனுமதிக்கப்பட்டுள்ளனர்.

இதன் மூலம் மத்தியப் பிரதேசத்தில் கோவிட் -19 நோய்த்தொற்று 14 ஆக அதிகரித்துள்ளதாக சுகாதார அதிகாரிகள் தெரிவித்தனர்.

இதில் ஒருவர் கூட அயல்நாடு சென்று திரும்பியவர்கள் அல்லர். இந்த 14 பேரில் பெண் ஒருவரும் அடங்குவார். முன்னதாக ஜபல்பூரில் 6 கரோனா தொற்று பாசிட்டிவ் ஆகியுள்ளது.

இந்நிலையில் மத்தியப் பிரதேச முக்கிய நகரங்கள் லாக் டவுனில் உள்ளன. இதற்கிடையே இந்தியாவில் கரோனா வைரஸ் தொற்று பாதிக்கப்பட்டோர் எண்ணிக்கை 562 ஆக அதிகரித்துள்ளது. இதில் 43 பேர் அயல்நாட்டினர் என்பது குறிப்பிடத்தக்கது.