ஜான் கோரி 10

குளிர்பதனத் தொழில்நுட்பத்தின் (ஏர் கண்டிஷன்) தந்தை என்று போற்றப்படும் ஜான் கோரி (John Gorrie) பிறந்த தினம் இன்று (அக்டோபர் 3). அவரைப் பற்றிய அரிய முத்துக்கள் பத்து:

l அமெரிக்காவின் தெற்கு கரோலினா மாநிலம் சார்லஸ்டன் நகரில் (1803) பிறந்தார். நியூயார்க் அருகே ஃபேர்ஃபீல்டு நகரில் மருத்துவம் பயின்றார். 1827-ல் பட்டம் பெற்று, மருத்துவப் பணியில் ஈடுபட்டார்.

l புளோரிடாவின் அப்பலாச்சிகோலா என்ற இடத்தில் குடியேறினார். அங்கு 2 மருத்துவமனைகளில் பணிபுரிந்தாலும் வருமானம் போதுமானதாக இல்லை. இதனால் போஸ்ட் மாஸ்டர், நோட்டரி பப்ளிக், வங்கி அதிகாரி போன்ற பணிகளில் ஈடுபட்டார். ஒரு ஹோட்டலும் நடத்தினார். மக்கள் மத்தியில் பிரபலமானவர் 1837-ல் அந்த ஊரின் மேயரானார்.

lசமுதாய சேவைகள், வர்த்தகத்தில் நாட்டம் செலுத்தினார். வெப்ப மண்டல நோய்கள் குறித்த ஆராய்ச்சியிலும் ஈடுபட்டார். சுகாதாரப் பிரச்சினைகளுக்குத் தீர்வு கண்டார். சமரச மைய நீதிபதியாக 1841-ல் நியமிக்கப்பட்டார்.

l அப்பகுதியில் மலேரியா, மஞ்சள் காமாலை வேகமாகப் பரவின. மற்ற வேலைகளை விட்டுவிட்டு, நோய்களை குணப்படுத்தும் முயற்சியில் முழு மூச்சாக இறங்கினார். இதற்கான சிகிச்சை முறையைக் கண்டறிவதில் முழு நேரத்தையும் செலவிட்டார்.

l காற்று மாசுபாடு காரணமாக மலேரியா பரவுவதாக நம்பப்பட்ட காலம் அது. (கொசுவே காரணம் என்று பின்னாளில் நிரூபிக்கப்பட்டது.) நோயாளிகளின் அறைக்குள் மாசுக் காற்றை வரவிடாமல் தடுத்து, அந்த அறையைக் குளிர்வித்து வெப்பத்தைக் குறைத்தால் காய்ச்சலின் தீவிரத்தைக் கட்டுப்படுத்தலாம் என்று எண்ணினார்.

l புளோரிடாவில் குளிர்காலம் தவிர மற்ற நேரங்களில் பனிக்கட்டிகள் கிடைப்பது அபூர்வம். எனவே பனிக்கட்டி தயாரிப்புக் கருவியை உருவாக்கும் முயற்சியில் ஈடுபட்டார். மருத்துவத் தொழிலை விட்டுவிட்டு, பனிக்கட்டிக் கருவிக்கு இறுதி வடிவம் கொடுப்பதில் முழுமூச்சாக இறங்கினார்.

l மலேரியா, அறைகளைக் குளிரூட்டும் முறைகள், பனிக்கட்டி உற்பத்தி தொடர்பாக பல கட்டுரைகளை வெளியிட்டு வந்தார். இவரது கட்டுரைகள் பிரபல அறிவியல் இதழ்களில் வெளிவந்தன.

l பல ஆண்டுகால ஆராய்ச்சிக்குப் பிறகு, பனிக்கட்டிகளை உருவாக்கி அறையைக் குளிரூட்டக்கூடிய நீராவியில் இயங்கும் கருவியைக் கண்டறிந்தார். அதற்கு 1848-ல் காப்புரிமை பெற்றார். இந்த சாதனத்தை அதிக எண்ணிக்கையில் உற்பத்தி செய்வதற்கான நிதியுதவி பெற 7 ஆண்டுகள் பாடுபட்டார். ஆனால், அவரது முயற்சி வெற்றி பெறவில்லை. சொந்தக் கையிருப்பையும் இழந்தார்.

l தற்போதைய அனைத்து விதமான ஏர் கண்டிஷன் கருவிகளின் பெரும்பாலான நுட்பங்கள், முதன்முதலாக இவர் கண்டறிந்த குளிரூட்டும் கோட்பாடுகளை அடிப்படையாகக் கொண்டவையே. குளிர்பதன இயந்திரம், பனிக்கட்டி தயாரிக்கும் வழிமுறை, ஏர் கண்டிஷன் கருவிகளை முதன்முதலில் உருவாக்கியவர் என்ற பெருமையைப் பெற்றார்.

l பொருளாதாரரீதியில் சற்று நொடித்துப்போனாலும் கடைசி வரை மனிதநேயத்துடன் விளங்கிய ஜான் கோரி, உடல்நலம் பாதிக்கப்பட்டு 52-வது வயதில் (1855) மறைந்தார். அமெரிக்காவில் பல அமைப்புகளுக்கு இவரது பெயர் வைக்கப்பட்டுள்ளது. புளோரிடாவில் இவரது சிலை அமைக்கப்பட்டுள்ளது. இவர் கண்டுபிடித்த பனிக்கட்டிக் கருவி புளோரிடாவின் ஜான் கோரி மியூசியம் ஸ்டேட் பார்க்கில் வைக்கப்பட்டுள்ளது.