பால் ராபின் க்ரக்மேன் 10

அமெரிக்க பொருளாதார நிபுணர், பேராசிரியர் பால் ராபின் க்ரக்மேன் (Paul Robin Krugman) பிறந்த நாள் இன்று (பிப்ரவரி 28). அவரைப் பற்றிய அரிய முத்துக்கள் பத்து:

 அமெரிக்காவின் அல்பனீ நகரில் (1953) பிறந்தார். புகழ்பெற்ற யேல் பல்கலைக்கழகத்தில் பொருளாதாரத்தில் இளங்கலைப் பட்டமும், மசாசூசெட்ஸ் இன்ஸ்டிடியூட் ஆஃப் டெக்னாலஜியில் (எம்ஐடி) முனைவர் பட்டமும் பெற்றார்.

 ஐசக் அசிமோவின் ‘பவுண்டேஷன்’ நாவல்களைப் படித்ததால் பொருளாதாரத்தில் ஆர்வம் பிறந்தது என்கிறார். எம்ஐடி, ஸ்டான்போர்டு, லண்டன் ஸ்கூல் ஆப் எகனாமிக்ஸ், கலிபோர்னியா பல்கலைக்கழகம் என உலகப் புகழ்பெற்ற பல்கலைக்கழகங்களில் பொருளாதாரத் துறை பேராசிரியராகப் பணிபுரிந்துள்ளார்.

 சர்வதேச பொருளாதாரம், பொருளாதாரப் புவியியல், சர்வதேச நிதி ஆகிய துறைகளில் ஆழ்ந்த அறிவும் அனுபவமும் மிக்கவர். அமெரிக்காவின் முக்கியமான பொருளாதாரச் சிந்தனையாளர்களில் ஒருவராகக் கருதப்படுபவர்.

 தடையற்ற வர்த்தகம், உலகமயமாக்கல் கொள்கைகளை ஆதரிப்பவர். கடந்த 2000-ல் இருந்து ‘நியூயார்க் டைம்ஸ்’ நாளிதழில் கட்டுரை எழுதிவருகிறார். பொருளாதாரம் குறித்து 20-க்கும் மேற்பட்ட புத்தகங்கள், 200-க்கும் மேற்பட்ட கட்டுரைகள் எழுதியுள்ளார்.

 சிக்கலான பொருளாதாரக் கோட்பாடுகளைக்கூட அனைவரும் புரிந்துகொள்ளும் வகையில் எளிய நடையில் எழுதக்கூடியவர். வருவாய் விநியோகம், வரி விதிப்பு, சர்வதேசப் பொருளாதாரம் உள்ளிட்ட பொருளாதாரப் பிரச்சினைகள் குறித்து எழுதியுள்ளார்.

 பாடப் புத்தகங்கள் தவிர, அமெரிக்காவின் புதிய பொருளாதாரக் கொள்கைகளால் அதிகரித்துவந்த வருவாய் ஏற்றத் தாழ்வுகள் குறித்தும் பல புத்தகங்கள் எழுதினார்.

 தான் பத்திரிகையில் எழுதிய கட்டுரைகளை ‘தி கிரேட் அன்ரிவீலிங்’ என்ற பெயரில் தொகுத்து 2003-ல் வெளியிட்டார். 2010-ல் ‘கெட் ஹிம் டு தி கிரீக்’ என்ற நகைச்சுவைத் திரைப்படத்தில் நடித்தார்.

 ஆடம் ஸ்மித் விருது, காலம்னிஸ்ட் ஆஃப் தி இயர் உட்பட ஏராளமான விருதுகள், பரிசுகளை வென்றுள்ளார். பல பல்கலைக்கழகங்கள் இவருக்கு கவுரவ டாக்டர் பட்டம் வழங்கியுள்ளன. 2000-ல் இருந்து பிரின்ஸ்டன் பல்கலைக்கழகத்தில் பொருளாதாரம் மற்றும் பன்னாட்டு இயல் பேராசிரியராகப் பணியாற்றினார்.

 புது வணிகத் தேற்றம் (New Trade Theory), புதிய பொருளாதாரப் புவியியல் (New Economic Geography) துறைகளில் இவரது பங்களிப்பை கவுரவித்து 2008-ல் பொருளாதார அறிவியலுக்கான நோபல் நினைவுப் பரிசு (Nobel Memorial Prize in Economic Science) வழங்கப்பட்டது.

 லண்டன் ஸ்கூல் ஆஃப் எகனாமிக்ஸ் கல்வி நிறுவனத்தில் பேராசிரியராகப் பணியாற்றி வருகிறார். சர்வதேச பொருளாதார அமைப்பில் உறுப்பினராக உள்ளார். அமெரிக்க தேசிய பொருளாதார ஆய்வு நிறுவனத்தில் 1979 முதல் இணை ஆராய்ச்சியாளராகவும் இருந்துவருகிறார்.