அமைச்சர் கே.என்.நேரு மீதான ‘ஊழல்’ வழக்கு... திமுக ‘இமேஜ்’ டேமேஜா?
தமிழக நகராட்சி நிர்வாகம், குடிநீர் வழங்கல் துறையில் முறைகேடாக டெண்டர் வழங்கப்பட்டுள்ளதாகவும், உதவி பொறியாளர், இளநிலை பொறியாளர், நகரமைப்பு அலுவலர் உள்ளிட்ட 2,538 பணியிடங்களுக்கு தலா 25 லட்சம் ரூபாய் முதல் 35 லட்சம் ரூபாய் வரை லஞ்சப் பணம் வசூலிக்கப்பட்டு, பணி நியமனம் நடந்துள்ளதாகவும் தமிழக டிஜிபிக்கு அமலாக்கத் துறை கடந்த 2025 அக்டோபர் 27-ம் தேதி கடிதம் அனுப்பியது.
அதில், தமிழக நகராட்சி நிர்வாகம் மற்றும் குடிநீர் வழங்கல் துறை அமைச்சர் கே.என்.நேருவின் சகோதரர்களான ரவிச்சந்திரன், மணிவண்ணனுக்கு சொந்தமான இடங்களில் நடத்தப்பட்ட சோதனையின்போது கிடைத்த ஆவணங்களின் அடிப்படையில், மிகப் பெரிய முறைகேடு நடந்திருப்பது கண்டுபிடிக்கப்பட்டுள்ளதாக அமலாக்கத் துறை தெரிவித்திருந்தது. நேரு மீது நடவடிக்கை எடுக்கக் கோரி தமிழக டிஜிபிக்கு அமலாக்கத் துறை மொத்தம் மூன்று முறை கடிதம் அனுப்பியது.
அமலாக்கத் துறை அனுப்பியகடிதத்தின் அடிப்படையில் அமைச்சர் நேரு, அவரது சகோதரர்கள் ரவிச்சந்திரன், மணிவண்ணன் உள்ளிட்டோர் மீது ஊழல் வழக்கு பதிவு செய்து நடவடிக்கை எடுக்கக் கோரி மதுரையைச் சேர்ந்த ஆதிநாராயணன் மற்றும் அதிமுக எம்.பி. இன்பதுரை ஆகியோர் சென்னை உயர் நீதிமன்றத்தில் தனித்தனியாக வழக்கு தொடர்ந்தனர்.
தலைமை நீதிபதி எம்.எம். ஸ்ரீவஸ்தவா, நீதிபதி ஜி.அருள்முருகன் அமர்வில் இந்த வழக்கு விசாரணை ஏற்கெனவே நடந்தது. அப்போது சம்பந்தப்பட்ட தரப்புகள் பல்வேறு வாதங்களை முன்வைத்தன. அரசு தலைமை வழக்கறிஞர் பி.எஸ்.ராமன், “அதிமுக எம்.பி. இன்பதுரை, தேர்தல் நேரத்தில் அரசியல் காழ்ப்புணர்ச்சியால் இந்த வழக்கை தொடர்ந்துள்ளார்” என்றார்.
அமலாக்கத் துறை தரப்பில் ஆஜரான சிறப்பு வழக்கறிஞர் என்.ரமேஷ், “இந்த விவகாரத்தில் டிஜிபிக்கு வெறும் கடிதம் மட்டுமின்றி, அனைத்து குற்றச்சாட்டுகளுக்கும் டிஜிட்டல் ஆவணங்களை அனுப்பி அமலாக்கத் துறை தனது கடமையை முறையாக செய்துள்ளது. அந்த ஆதாரங்களின் அடிப்படையில் ஆரம்பகட்ட விசாரணையே நடத்தாமல், சம்பந்தப்பட்டவர்கள் மீது நேரடியாகவே வழக்கு பதிவு செய்ய முடியும். ஆனால், தமிழக போலீஸார் தங்களது கடமையை செய்யவில்லை” என்று வாதிட்டார்.
அனைத்து தரப்பு வாதங்களையும் கேட்ட நீதிபதிகள், “தமிழக நகராட்சி நிர்வாகம், குடிநீர் வழங்கல் துறையில் நடந்துள்ள இந்த முறைகேடு மூலமாக பல நூறு கோடி ரூபாய் லஞ்சப் பணம் ஹவாலா முறையில் கைமாறியுள்ளதாக அமலாக்கத் துறை ஆதாரப்பூர்வமாக குற்றம்சாட்டியுள்ளது. இந்த விவகாரத்தில் அரசு உயர் அதிகாரிகள், அமைச்சரின் உறவினர்கள், அரசியல்வாதிகளின் நெருங்கிய நட்பு வட்டாரங்கள், விண்ணப்பதாரர்கள் என கூட்டணி அமைத்து செயல்பட்டுள்ளனர்.
தேர்வு முடிவு வெளியாகும் முன்பே சம்பந்தப்பட்டவர்களுக்கு அதுகுறித்த விவரம் முறைகேடாக தெரிவிக்கப்பட்டு, பணம் வசூலிக்கப்பட்டுள்ளது. 2,538 பேரும் பணியில் சேர்ந்து 6 மாதங்களுக்கு மேல் ஆகிவிட்டது. நேர்காணல் கடிதத்துடன் 10 ரூபாய் நோட்டை அடையாளமாகக் கொடுத்து கோடிக்கணக்கில் லஞ்சப் பணம் ஹவாலா முறையில் வசூலிக்கப்பட்டுள்ளது. அதற்கான ஆதாரங்களை வாட்ஸ்அப் உரையாடல்கள், ஸ்கிரீன் ஷாட்கள் மூலம் அமலாக்கத் துறை நிரூபித்துள்ளது.
முறைகேடு நடந்துள்ளதாக தகவல்களை அனுப்பியது புலனாய்வு அமைப்பான அமலாக்கத் துறை ஒன்றும் மூன்றாம் நபர்கள் அல்ல. அவ்வாறு ஆதாரங்களுடன் கடிதம் அனுப்பி மூன்றரை மாதங்களுக்கு மேல் ஆகின்றன. ஆனாலும், தமிழக போலீஸார் இன்னும் நடவடிக்கை எடுக்காமல், ஆரம்பகட்ட விசாரணை என்று கூறி வழக்கு பதிவு செய்யாமல் இழுத்தடிப்பது அதிருப்தி அளிக்கிறது. எனவே, அமலாக்கத் துறை அனுப்பிய ஆதாரங்களின் அடிப்படையில் தமிழக லஞ்ச ஒழிப்புத்துறை போலீஸார் தாமதம் இன்றி, சம்பந்தப்பட்டவர்கள் மீது உடனடியாக வழக்கு பதிவு செய்ய வேண்டும். விரிவான விசாரணை நடத்தி, அதன் அடிப்படையில் சட்டப்பூர்வ நடவடிக்கை எடுக்க வேண்டும்” என்று நீதிபதிகள் உத்தரவிட்டுள்ளனர்.
இதன் தொடர்ச்சியாக, “மக்கள் வரிப்பணத்தை உறிஞ்சி, கமிஷனில் கொழுக்கும் திமுக அரசின் ஊழல் கோட்டை சுக்குநூறாக இடிந்து விழும் நாளுக்கான கவுண்டவுன் தொடங்கிவிட்டது” என எதிர்க்கட்சிகள் கடுமையாக விமர்சித்துள்ளன. இதற்கெல்லாம் ரியாக்ட் செய்துள்ள திமுக அமைப்புச் செயலாளர் ஆர்.எஸ்.பாரதி, “இது ஒன்றும் பின்னடைவு அல்ல. திமுகவின் சட்டத் துறை இதனைச் சட்டரீதியாகச் சந்தித்து முறியடிக்கத் தயாராக இருக்கிறது. இவை அனைத்தும் தேர்தல் நேரத்தில் முதல்வர் ஸ்டாலின் மற்றும் திமுக இமேஜைக் கெடுப்பதற்காகச் செய்யப்படும் சூழ்ச்சிகள்” என்றார் ஆர்.எஸ்.பாரதி.
