கிரிக்கெட் ரசிகர்களின் திருவிழா போல காட்சி அளிக்கிறது, இந்தியா - பாகிஸ்தான் போட்டி நடைபெறும் அகமதாபாத் - நரேந்திர மோடி மைதானம். | படங்கள்: விஜய் சோனேஜி, ஆர்.தீபக்
நடப்பு உலகக் கோப்பை தொடரில் இந்தியா - பாகிஸ்தான் இடையிலான முதல் போட்டி அகமதாபாத்தில் உள்ள நரேந்திர மோடி மைதானத்தில் நடைபெற்று வருகிறது. இதில் டாஸ் வென்ற இந்திய அணி பந்துவீச்சை தேர்வு செய்து தற்போது விளையாடி வருகிறது.
பிற்பகல் 2 மணிக்கு தொடங்கிய இந்தப் போட்டியைக் காண மைதானத்தின் வாயிலில் முற்பகல் 11.30 மணி அளவில் ரசிகர்கள் பெருமளவில் கூடியிருந்து ஆரவாரம் செய்தனர்.
நரேந்திர மோடி மைதானத்துக்கு வெளியே ஆயிரக்கணக்கான ரசிகர்கள் தேசிய கொடியுடன் குவிந்ததால் வீதியே கரகோஷத்தில் விழாக்கோலம் பூண்டது. பலத்த சோதனைகளுக்குப் பிறகே ரசிகர்களை காவல் துறையினர் மைதானத்துக்குள் அனுமதித்தனர்.
இந்தியா - பாகிஸ்தான் இடையிலான போட்டியை முன்னிட்டு இசை நிகழ்ச்சிகள் ஏற்பாடு செய்யப்பட்டிருந்தன.
உலகக் கோப்பையின் துவக்க நாளில்தான் இசை நிகழ்ச்சிகள் நடைபெறுவது வழக்கம். ஆனால், இடையில் நடைபெறும் ஒரு போட்டிக்காக (இந்தியா - பாகிஸ்தான்) இவ்வாறு கலை நிகழ்ச்சி ஏற்பாடு செய்யப்பட்டிருப்பது சர்ச்சையை ஏற்படுத்தியிருந்தது.
சுமார் 12.30 மணி அளவில் பாடகர்கள் சங்கர் மகாதேவன், அர்ஜித் சிங், சுக்விந்தர் சிங் ஆகியோர் மைதானத்தில் இசை நிகழ்ச்சியை நடத்தினர்.
இந்த இசை நிகழ்ச்சி அரங்கில் உள்ள பார்வையாளர்கள் கண்டுகளிக்க மட்டுமே தவிர, ஒளிபரப்பப்படாது என ஸ்டார் ஸபோர்ட்ஸ் தெரிவித்திருந்தது. அதனால், அந்த நிகழ்ச்சிகள் டிவியில் ஒளிபரப்பாகவில்லை.
அசம்பாவிதங்களை தவிர்க்க நரேந்திர மோடி மைதானத்தின் நுழைவாயிலில் உயர்மட்ட போலீஸ் பாதுகாப்பு போடப்பட்டிருந்தது.
இந்தியா - பாகிஸ்தான் அணிகளுக்கிடையிலான உலக கோப்பை தொடர் போட்டியில் டாஸ் வென்ற இந்திய அணியின் கேப்டன் ரோகித் சர்மா பந்துவீச்சை தேர்வு செய்துள்ளார்.
7 வருடங்களுக்கு பிறகு பாகிஸ்தான் அணி, இந்தியாவுக்கு எதிராக இந்திய மண்ணில் விளையாடுகிறது. இதனால், இந்த ஆட்டம் மிகுந்த எதிர்பார்ப்பை ஏற்படுத்தியுள்ளது.
காயம் காரணமாக சிகிச்சையிலிருந்த சுப்மன் கில் மீண்டும் அணிக்கு திரும்பியிருப்பது பலமாக பார்க்கப்படுகிறது.
இந்திய அணி ப்ளேயில் லெவன்: ரோகித் சர்மா, சுப்மன் கில், விராட் கோலி, ஷ்ரேயாஸ் ஐயர், கே.எல். ராகுல், ஹர்திக் பாண்டியா, ரவீந்திர ஜடேஜா, ஷர்துல் தாக்கூர், குல்தீப் யாதவ், ஜஸ்பிரித் பும்ரா, முகமது சிராஜ்
பாகிஸ்தான் ப்ளேயிங் லெவன்: அப்துல்லா ஷபீக், இமாம்-உல்-ஹக், பாபர் ஆசம், முகமது ரிஸ்வான், சவுத் ஷகீல், இப்திகார் அகமது, ஷதாப் கான், முகமது நவாஸ், ஹசன் அலி, ஷாஹீன் அப்ரிடி, ஹாரிஸ் ரவுஃப்.
