டாக்கா: ஜவுளி தொழிலாளர்களின் தொடர் போராட்டங்களால் வங்கதேசத்தில் மீண்டும் வன்முறை, கலவரம் ஏற்பட்டிருக்கிறது. கடந்த 2009-ம் ஆண்டு முதல் 2024-ம் ஆண்டு வரை வங்கதேச பிரதமராக ஷேக் ஹசீனா பதவி வகித்தார். அவரது ஆட்சிக் காலத்தில் ஜவுளி துறை செழித்தோங்கியது. சர்வதேச ஜவுளி ஏற்றுமதியில் சீனாவுக்கு அடுத்து வங்கதேசம் 2-ம் இடத்தைப் பிடித்தது.
அந்த நாடு முழுவதும் 4,000-க்கும் மேற்பட்ட ஆயத்த ஆடை ஜவுளி ஆலைகள் செயல்பட்டு வந்தன. சுமார் 40 லட்சம் தொழிலாளர்கள் ஜவுளி துறையில் பணியாற்றினர். 150-க்கும் மேற்பட்ட நாடுகளுக்கு ஆயத்த ஆடைகள் ஏற்றுமதி செய்யப்பட்டு வந்தன. கடந்த 2024-ம் ஆண்டில் மாணவர்களின் போராட்டத்தால் ஷேக் ஹசீனா பதவி விலகி இந்தியாவில் தஞ்சமடைந்தார். இதன்பிறகு முகமது யூனுஸ் ஆட்சி கடந்த பிப்ரவரி வரை நீடித்தது. பின்னர் நடந்த தேர்தலில் வெற்றிபெற்று தாரிக் ரஹ்மான் பிரதமராகப் பதவியேற்றார். தாரிக் ரஹ்மான் அரசும் இந்தியாவுக்கு எதிரான மோதல் போக்கை கடைப்பிடித்து வருகிறது.
ஷேக் ஹசீனா ஆட்சிக் காலத்தில் இந்தியாவில் இருந்து தரமான பருத்தியை வங்கதேசம் இறக்குமதி செய்து வந்தது. கடந்த சில ஆண்டுகளாக இந்திய பருத்தி இறக்குமதி நிறுத்தப்பட்டு உள்நாட்டு பருத்தியில் ஆயத்த ஆடைகள் தயாரிக்கப்பட்டன. தரம் குறைந்த வங்கதேச பருத்தியால் வெளிநாட்டு ஏற்றுமதி கணிசமாக குறைந்துவிட்டது.
அமெரிக்கா, ஈரான் போரால் வங்கதேசத்தில் பெட்ரோல், டீசல், எரிவாயு தட்டுப்பாடு ஏற்பட்டு உள்ளது. எரிசக்தி தட்டுப்பாடு காரணமாக வங்கதேச மின் உற்பத்தி முடங்கி, நாள்தோறும் 16 மணி நேரம் வரை மின் தடை ஏற்படுகிறது. இக்காரணங்களால் வங்கதேசம் முழுவதும் 1,000-க்கும் மேற்பட்ட ஜவுளி ஆலைகள் மூடப்பட்டு உள்ளன. லட்சக்கணக்கான தொழிலாளர்கள் வேலையிழந்து உள்ளனர்.
இந்த சூழலில் வங்கதேச ஜவுளி ஆலை தொழிலாளர்கள் வேலைவாய்ப்பு மற்றும் ஊதிய உயர்வு கோரி தொடர் போராட்டங்களில் ஈடுபட்டு வருகின்றனர். தலைநகர் டாக்கா, காஜிபூர், அஷுலியா, சாவர் உள்ளிட்ட நகரங்களில் ஜவுளி தொழிலாளர்களின் போராட்டத்தால் மிகப்பெரிய அளவில் வன்முறை, கலவரம் வெடித்திருக்கிறது.
டாக்காவில் நேற்று முன்தினம் போலீஸாருக்கும், தொழிலாளர்களுக்கும் இடையே மிகப்பெரிய மோதல் ஏற்பட்டது. போலீஸார் தடியடி நடத்தியும், கண்ணீர் புகைக்குண்டுகளை வீசியும் கூட்டத்தை கலைத்தனர். போலீஸ் வாகனங்கள் தீ வைத்து எரிக்கப்பட்டன. அங்குள்ள நெடுஞ்சாலை மூடப்பட்டு உள்ளது. வன்முறை, கலவரம், போராட்டங்கள் நீடித்தால் வங்கதேசத்தில் மீண்டும் ஆட்சி மாற்றம் ஏற்பட வாய்ப்பிருக்கிறது என்று சர்வதேச அரசியல் நோக்கர்கள் தெரிவித்துள்ளனர்.
முன்னாள் பிரதமர் ஷேக் ஹசீனா அண்மையில் தனியார் தொலைக்காட்சிக்கு அளித்த பேட்டியில், “விரைவில் வங்கதேசத்துக்கு திரும்புவேன்” என்று பகிரங்கமாக அறிவித்தார். இதை சுட்டிக் காட்டியுள்ள வங்கதேச தேசியவாத காங்கிரஸ் மூத்த தலைவர்கள், ஹசீனாவின் அவாமி லீக் கட்சியினர் வன்முறை, கலவரத்தைத் தூண்டி வருவதாக குற்றம் சாட்டி வருகின்றனர்.
