பெமா வாங் தாங்டாக்
பெய்ஜிங்: அருணாச்சலப் பிரதேசத்தினரின் இந்திய பாஸ்போர்ட் செல்லாது என்று கூறி, ஷாங்காய் விமான நிலையத்தில் இந்திய பெண் பயணி அலைக்கழிக்கப்பட்டதாக எழுந்த புகாரை மறுத்துள்ள சீனா, அனைத்து செயல்களும் சட்டப்படியும் விதிமுறைகளின்படியுமே நடந்ததாகத் தெரிவித்துள்ளது.
அருணாச்சலப் பிரதேசத்தை சேர்ந்த பெமா வாங் தாங்டாக் என்பவர், லண்டனில் இருந்து ஜப்பான் சென்றுள்ளார். வழியில் சீனாவின் ஷாங்காய் விமான நிலையத்தில் இறங்கி 3 மணி நேரத்துக்குப்பின் மாற்று விமானத்தில் ஜப்பான் செல்ல திட்டமிட்டுள்ளார். கடந்த 21-ம் தேதி இவர் ஷாங்காய் விமான நிலையத்தில் தரையிறங்கியபோது, இவரது இந்திய பாஸ்போர்ட் செல்லாது என சீன குடியுரிமை அதிகாரிகளும், சீன ஈஸ்டர்ன் ஏர்லைன்ஸ் நிறுவன அதிகாரிகளும் கூறியுள்ளனர். காரணம் அவரது பாஸ்போர்ட்டில் பிறந்த இடம் அருணாச்சலப் பிரதேசம் என குறிப்பிடப்பட்டிருந்தது.
அருணாச்சலப் பிரதேசம் சீனாவில் இருக்கும் பகுதி எனக் கூறி, அவரது இந்திய பாஸ்போர்ட் செல்லாது என கூறி பெமா வாங்கை சீன அதிகாரிகள் கைது செய்துள்ளனர். 18 மணி நேரத்துக்கும் மேலாக அவர் ஷாங்காய் விமான நிலையத்தில் சிறைவைக்கப்பட்டார். விமான நிலையத்தில் உள்ள உணவு விடுதி மற்றும் இதர வசதிகளை பெமா வாங் பயன்படுத்தவும் அனுமதிக்கவில்லை. பின்னர் லண்டனில் உள்ள நண்பர் மூலம் ஷாங்காய் நகரில் உள்ள இந்திய தூதரகத்தை பெமா வாங் தொடர்பு கொண்டதை அடுத்து, இந்திய தூதரக அதிகாரிகள் தலையிட்டு அவரை ஜப்பானுக்கு அனுப்பி வைத்துள்ளனர்.
"இது இந்திய இறையாண்மை மீதான நேரடி தாக்குதல். இந்த விவகாரம் குறித்து பிரதமர் மோடியும், இந்திய அதிகாரிகளும் சீன அரசுடன் பேச வேண்டும். அருணாச்சலப் பிரதேசத்தை சேர்ந்த இந்தியர்கள் வெளிநாடுகள் செல்லும்போது, அவர்களின் பாதுகாப்புக்கு உத்தரவாதம் அளிக்கப்பட வேண்டும்" என பெமா வாங் தாங்டாக் கூறி இருந்தார்.
இந்நிலையில், இந்த விவகாரம் குறித்து விளக்கம் அளித்துள்ள சீன வெளியுறவுத்துறை செய்தித் தொடர்பாளர் மாவோ நிங், "அந்தப் பெண் கூறியதுபோல அவர் தடுப்புக் காவலில் வைக்கப்படவில்லை. துன்புறுத்தலுக்கு உள்ளாக்கப்படவில்லை. அவர் ஓய்வெடுக்க, குடிக்க, உணவு உட்கொள்ள விமான நிறுவனம் ஓர் இடத்தை வழங்கியது.
சட்டங்கள் மற்றும் விதிமுறைகளின்படி முழு செயல்முறைகளையும் சீனாவின் எல்லை ஆய்வு அதிகாரிகள் மேற்கொண்டுள்ளனர். மேலும், அவரின் சட்டப்பூர்வ உரிமைகள் மற்றும் நலன்களை அவர்கள் முழுமையாக பாதுகாத்துள்ளனர் என்பதை நாங்கள் தெரிந்து கொண்டோம். மேலும், அருணாச்சலப் பிரதேசத்தை சீனா ஒருபோதும் அங்கீகரிக்கவில்லை. அது சீனாவின் ஜங்னான் பிரதேசம்" என தெரிவித்துள்ளார்.
இதனிடையே, சம்பவம் நடந்த அதே நாளில் சீனாவுக்கு எதிராக இந்தியா வலுவான ராஜதந்திர எதிர்ப்பை பதிவு செய்ததாக டெல்லி வட்டாரங்கள் தெரிவித்துள்ளன. அருணாச்சலப் பிரதேசம் சந்தேகத்துக்கு இடமின்றி இந்திய பகுதி என்றும் அதில் வசிப்பவர்கள் அனைவரும் இந்திய குடிமக்கள் என்றும் அவர்கள் இந்திய பாஸ்போர்ட்டை வைத்திருக்கவும் பயணிக்கவும் முழு உரிமை பெற்றவர்கள் என்றும் சீன தரப்புக்கு உறுதியாக தெரிவித்ததாக அந்த வட்டாரங்கள் கூறியுள்ளன.
மேலும், ஷாங்காயில் உள்ள இந்திய தூதரகம் இந்த விவகாரத்தை உள்ளூர் மட்டம் அளவில் எடுத்துக்கொண்டு சிக்கித் தவித்த பயணிக்கு முழு உதவியை வழங்கியதாகவும் அவர்கள் தெரிவித்துள்ளனர்.
