உலக மசாலா: அந்தக் குடும்பத்துக்குக் கொடுத்து வைக்கலை ஜெனிபர்!

அமெரிக்காவில் வசிக்கும் 27 வயது ஜெனிபர் ப்ரிகர் அக்ரோபடிக்ஸ் கலைஞர். ருமேனியாவில் ஒரு தம்பதிக்கு மூன்று மகள்களில் ஒருவராகப் பிறந்தவர். பிறக்கும்போதே அவருக்குக் கால்கள் இல்லை. அதனால் அவரது தந்தை குழந்தையை வளர்க்க விரும்பவில்லை. அமெரிக்க தம்பதிகள் ஜெனிபரைத் தத்தெடுத்துக்கொண்டனர். அக்ரோபடிக்ஸ், ஜிம்னாஸ்டிக்ஸ் போன்றவற்றில் இயல்பிலேயே ஜெனிபருக்கு ஆர்வம் வந்தது. அதனால் அந்தக் கலைகளைக் கற்றுக்கொண்டார்.

‘‘என் பெற்றோர், என் குடும்பம், என் பள்ளி, என் பயிற்சியாளர் என்று யாருமே என் குறைபாட்டைச் சுட்டிக் காட்டியதில்லை. என் பெற்றோர் நான் குழந்தையாக இருந்தபோதே தத்தெடுக்கப்பட்ட குழந்தை என்று எனக்குப் புரிய வைத்துவிட்டனர். 11 வயதில் என் நிகழ்ச்சியைப் பார்த்தவர்கள், ஒலிம்பிக்கில் தங்கம் வென்ற டொமினிக் மொசியனு போலவே இருப்பதாகச் சொன்னார்கள். சற்று வளர்ந்த பிறகு எனக்கும் அவருக்குமான தொடர்பு பற்றி ஆராய்ந்தேன்.

அவரும் ருமேனியாவைச் சேர்ந்தவர். இருவருக்கும் ஜிம்னாஸ்டிக்ஸ் மீது ஆர்வம். என் பெற்றோரிடம் விசாரித்தபோது மொசியனு என்பதுதான் என்னைப் பெற்றவரின் பெயர் என்றனர். நான் சிறுவயதில் என் ரோல்மாடலாகக் கருதியவர் என் சகோதரி என்பதை அறிந்து மகிழ்ச்சியடைந்தேன். நானும் டொமினிக்கும் சகோதரிகள் என்பதை உறுதி செய்துகொண்டேன்.

பலமுறை தொலைபேசியில் தொடர்புகொண்டேன். பேச முடியவில்லை. ஒரு கடிதமாக எழுதி, பத்திரிகையில் பிரசுரம் செய்தேன். என்னைப் பெற்ற அப்பா இப்பொழுது உயிருடன் இல்லை. அம்மாவையும் சகோதரிகளையும் பார்க்க ஆர்வமாக இருக்கிறேன். டிஎன்ஏ பரிசோதனைக்கும் தயாராக இருக்கிறேன் என்று தெரிவித்தேன். ஆனால் செய்தி அறிந்த டொமினிக் ஆத்திரம் அடைந்துவிட்டார். பிறகு, எனக்கென்று மிக அருமையான பெற்றோரும் சகோதரர்களும் இருக்கிறார்கள். நான் என்னை முன்னேற்றிக்கொள்வதில் கவனத்தைத் திருப்பினேன். இன்று எல்லோரும் பாராட்டும் பெண்ணாக உயர்ந்திருக்கிறேன். பலருக்கு ரோல்மாடலாக இருக்கிறேன்’’ என்கிறார் ஜெனிபர்.

அந்தக் குடும்பத்துக்குக் கொடுத்து வைக்கலை ஜெனிபர்!

அலாஸ்காவில் வசிக்கிறார் சாண்டா க்ளாஸ். இவர் பெயர் சாண்டா க்ளாஸாக இருந்தாலும் இவர் நிஜ சாண்டா க்ளாஸ் இல்லை. சாண்டா க்ளாஸ் என்ற பெயரில் வசித்து வருபவர். அலாஸ்காவின் நகர சபை தேர்தலில் போட்டியிடுகிறார். வெண் தாடியும் சிவப்பு ஆடையுமாக வலம் வரும் சாண்டா க்ளாஸ், தனது ஃபேஸ்புக், ட்விட்டர் பக்கத்தில்,

‘‘யாரும் பரிசுப் பொருள் கேட்டு எனக்குக் கோரிக்கை வைக்காதீர்கள். தொலைபேசி அழைப்புகள், இமெயில்கள், குழந்தைகளிடம் இருந்து வரும் கடிதங்கள் என்று எதற்கும் நான் பதில் அளிக்க மாட்டேன். நான் குழந்தைகள் நலனுக்காக 10 ஆண்டுகளுக்கும் மேலாக உழைத்து வருகிறேன். அமைப்புகளுக்கு நன்கொடை, உதவி போன்றவற்றைச் செய்ய விரும்புபவர்கள் மட்டும் என்னைத் தொடர்புகொள்ளலாம். அவர்களுக்குப் பதில் அளிப்பேன்’’ என்று கூறியிருக்கிறார். 2012-ம் ஆண்டு அமெரிக்க அதிபருக்காக நடைபெற்ற தேர்தலில் போட்டியிட விரும்பினார் சாண்டா க்ளாஸ். சிறிதும் ஆதரவு இல்லாததால் வெளியேற்றப்பட்டார்.’’ குழந்தைகளுக்கு மட்டும் ஓட்டுரிமை அளிக்கப்பட்டிருந்தால் நான் அதிபராகி இருப்பேன்’’ என்கிறார் சாண்டா க்ளாஸ்.

சாண்டா க்ளாஸ் பேரையாவது மாத்திருக்கலாம்…