வெளிநாடுகளைச் சேர்ந்தவர்கள் அமெரிக்காவில் தங்கி பணிபுரிய, ஹெச் – 1 பி விசா பெற்றிருக்க வேண்டியது அவசியம். இந்தியர்கள் உட்பட லட்சக்கணக்கான வெளிநாட்டவர்கள் இந்த விசாவை பெற்று, அமெரிக்காவில் உள்ள ஐ.டி. உட்பட பல்வேறு நிறுவனங்களில் பணிபுரிந்து வருகின்றனர்.
இதனிடையே, அமெரிக்கர்களுக்கு அதிகளவில் வேலைவாய்ப்பை வழங்குவதற்காக ஹெச் – 1 பி விசா வழங்குவதை நடப்பாண்டு இறுதி வரை நிறுத்தி வைப்பதாக அதிபர் ட்ரம்ப் அண்மையில் அறிவித்திருந்தார். இதற்கு பலத்த எதிர்ப்பு காணப்பட்டதால் இந்த அறிவிப்பு திரும்பப் பெறப்பட்டது.
இந்நிலையில், ஹெச் – 1 பி விசா வழங்கும் நடைமுறையில் சில மாற்றங்களை செய்து அமெரிக்க அரசு சமீபத்தில் சட்டம் இயற்றியது. இதில், விசா கட்டணம் உயர்வு என்பன உள்ளிட்ட பல்வேறு அம்சங்கள் சேர்க்கப்பட்டிருந்தன. அதன்படி, முதல் கட்டமாக தற்போது ஹெச் – 1 பி விசாவை பரிசீலிப்பதற்கான கட்டணம் நாளை முதல் 1,440 டாலரில் இருந்து 2,500 டாலராக உயர்த்தப்படுவதாக அமெரிக்க குடியுரிமை மற்றும் குடியேற்ற துறை அறிவித்திருக்கிறது. அதாவது, இந்திய ரூபாய் மதிப்பின் படி, ரூ.1.5 லட்சத்தில் இருந்து 1.83 லட்சமாக உயர்த்தப்பட்டிருக்கிறது.