ஹாங்காங்கில் முகமூடி அணிந்து போராட்டம் நடத்துவதற்குத் தடை விதிக்கப்பட்டுள்ளதை எதிர்த்து போராட்டக்காரர்கள் பேரணி சென்றனர்.
ஹாங்காங் நிர்வாக அரசை எதிர்த்து ஹாங்காங்கில் போராட்டக்காரர்கள் தொடர்ந்து போராட்டத்தில் ஈடுபட்டுள்ளனர். இதில் சமீபத்தில் சீன தேசிய தினத்தில் வன்முறை வெடித்தது.
ஹாங்காங்கில் வன்முறையைத் தடுக்க போராட்டங்களில் ஈடுபடுபவர்கள் முகமூடி அணியத் தடை விதிக்கப்பட்டுள்ளது. இதனைத் எதிர்த்து போராட்டக்காரர்கள் வெள்ளிக்கிழமை முகமூடி அணிந்து பேரணி சென்றனர்
இந்நிலையில் இந்தத் தடை குறித்து ஹாங்காங் நிர்வாக இயக்குனர் கேரி லேம், ''இந்த முகமூடி அணிவதற்கு எதிரான தடை, போராட்டங்களில் வன்முறையில் ஈடுபடுபவர்களை இலக்காகக் கொண்டு விதிக்கப்பட்டுள்ளது” என்று விளக்கம் அளித்துள்ளார்.
முகமூடிக்கான தடை போராட்டக்காரர்களிடம் அச்சத்தைத் தூண்டும் என்றும் சுதந்திரத்தைக் குறைக்கும் என்றும் ஹாங்காங்கின் சமூக ஆர்வலர்கள் இருவர் நீதிமன்றத்தில் வழக்கு தொடர்ந்துள்ளனர்.
இந்தத் தடை அனைத்துப் பொது நிகழ்வுகளிலும் கடைபிடிக்கப்படும் என்று அரசு தெரிவித்துள்ளதாக ஹாங்காங் ஊடகங்கள் செய்தி வெளியிட்டுள்ளன.
ஹாங்காங் போராட்டப் பின்னணி
இங்கிலாந்தின் காலனி ஆதிக்கத்தில் இருந்து ஹாங்காங் விடுவிக்கப்பட்ட பின்னர் கடந்த 1997-ம் ஆண்டு சீனாவின் நிர்வாகப் பகுதிகளில் ஒன்றானது ஹாங்காங். சீனாவின் நேரடிக் கட்டுப்பாட்டில் இருந்தாலும், ஹாங்காங் நாட்டுக்கென தனி கரன்சி, சட்டம், அரசியலமைப்பு எல்லாம் உள்ளன.
இந்நிலையில், ஹாங்காங்கில் குற்றம் சாட்டப்பட்ட குற்றவாளிகளை சீனாவுக்கு அழைத்துச் சென்று விசாரிக்கும் சட்டத் திருத்த மசோதாவை கடந்த ஜூன் மாதம் ஹாங்காங் கொண்டு வந்தது. இந்த மசோதாவுக்கு எதிராக ஹாங்காங்கில் தீவிரப் போராட்டங்கள் நடந்தன. லட்சக்கணக்கான மக்கள் வீதிகளில் திரண்டு புதிய சட்டத்துக்கு எதிராக ஆர்ப்பாட்டம் நடத்தினர். மாணவர்களும் போராட்டத்தில் குதித்தனர். கைதும் செய்யப்பட்டனர்.
இதன் காரணமாக போராட்டக்காரர்களுக்கும் போலீஸாருக்கும் இடையே அவ்வப்போது மோதல் நடைபெற்று வருகிறது. இதனிடையே, இந்த மசோதாவைத் திரும்பப் பெறுவதாக ஹாங்காங் அரசு அறிவித்தது.
எனினும் கடந்த 4 மாதங்களுக்கு மேலாக ஹாங்காங் போராட்டக்காரர்கள் அவர்களது பிற கோரிக்கைகளை நிறைவேற்றக் கோரி போராட்டத்தில் ஈடுபட்டு வருகின்றனர்.