ஐக்கிய நாடுகள் சபை பொதுக்கூட்டத்தில் ஈரான் அதிபரைச் சந்திக்க எந்தத் திட்டமும் இல்லை என்று அமெரிக்க அதிபர் ட்ரம்ப் தெரிவித்துள்ளார்.
நியூயார்க்கில் 74-வது ஐ.நா. பொதுக்குழுக் கூட்டம் தொடங்கி நடந்து வருகிறது. இது வரும் 30-ம் தேதி வரை நடக்கிறது. இதில் ட்ரம்ப் உள்ளிட்ட உலக நாடுகளின் தலைவர்கள் பலரும் கலந்து கொண்டுள்ளனர்.
இந்தப் பொதுக்குழுக் கூட்டத்தில் ஈரான் அதிபர் ஹசன் ரவ்ஹானியை அமெரிக்க அதிபர் ட்ரம்ப் சந்திக்கவுள்ளாரா? என்று கேள்வி கேட்கப்பட்டது.
இதற்கு ட்ரம்ப் பதிலளிக்கும்போது, “ஈரான் அதிபரைச் சந்திப்பது தொடர்பாக எந்தத் திட்டமும் தீட்டப்படவில்லை. என்ன நடக்கிறது? என்பதை பொறுத்திருந்துதான் பார்க்க வேண்டும்” என்று தெரிவித்தார்.
அமெரிக்க அதிபராக டொனால்டு ட்ரம்ப் பதவியேற்ற பிறகு, ஈரானுடனான அணு சக்தி ஒப்பந்தத்தை முறிப்பேன் என்றும் அந்நாட்டுடனான அணு ஆயுத ஒப்பந்தம் பைத்தியக்காரத்தனமானது என்றும் கடுமையாக விமர்சித்தார். இதனைத் தொடர்ந்து ஈரானுடனான ஒப்பந்தத்திலிருந்து அமெரிக்கா விலகியது.
ஆனால், அந்த ஒப்பந்தத்தில் கையெழுத்திட்டிருந்த பிற நாடுகள் ஈரானுக்கு ஆதரவு தெரிவித்தன. ஈரானுடனான அணுசக்தி ஒப்பந்தத்திலிருந்து வெளியேறியவுடன் அந்த நாட்டின் மீது பொருளாதாரத் தடைகளை அமெரிக்கா விதித்து வருகிறது.
மேலும் சமீபத்தில் சவுதி எண்ணெய் ஆலை தாக்கப்பட்டதன் பின்னணியில் ஈரான்தான் உள்ளது என்று அமெரிக்கா தொடர்ந்து குற்றம் சாட்டி வருகிறது.