உலக மசாலா: கொஞ்சம் அன்பு காட்டினால், அதிக அன்பை கொடுக்கும் நாய்!

அமெரிக்காவின் பென்சில்வேனியாவில் வசிக்கும் கைலா ஃபிலூன், காப்பகத்தில் ஒரு நாயைக் கண்டார். காயமடைந்து, நோய்வாய்ப்பட்டு, எடை குறைந்து மிக மோசமான நிலையில் இருந்தது. அதை விட்டுச் செல்ல அவருக்கு மனமில்லை. உடனே தத்தெடுத்து, வீட்டுக்கு அழைத்துவந்தார். மருத்துவம் பார்த்தார். கொஞ்சம் கொஞ்சமாகத் தேறி வருகிறது நாய். “ரஸ்ஸைப் பார்த்தவுடன் எனக்கு அன்பு பீறிட்டுவிட்டது. அதேபோல அதுவும் என் மேல் அளவற்ற அன்பு வைத்திருக்கிறது. நான் லேப்டாப்பில் வேலை செய்தால், என் அருகே அமர்ந்துகொண்டு கவனிக்கும். தொலைக்காட்சி பார்க்கும்போது தோளில் சாய்ந்துகொள்ளும். படுத்தால், அருகில் வந்து படுத்துக்கொள்ளும். வெளியே சென்று திரும்பினால் குழந்தையைப் போல கட்டிக்கொள்ளும். என்னிடம் இன்னும் சில நாய்கள் இருக்கின்றன. ஆனால் ரஸ், நாய்க்குரிய எந்தக் குணத்தோடும் இல்லை. மிகவும் சாதுவாகவும் அன்பாகவும் இருக்கிறது. ரஸ்ஸை விதவிதமாகப் புகைப்படங்கள் எடுத்து இணையத்தில் வெளியிட்டுவருகிறேன். இதுவரை 50 ஆயிரம் தடவைகள் புகைப்படங்கள் பகிரப்பட்டிருக்கின்றன” என்கிறார் கைலா.

கொஞ்சம் அன்பு காட்டினால், அதிக அன்பை கொடுக்கும் நாய்!

காதலர் தினத்துக்காக ஸ்பெஷல் ஸ்ட்ராபெர்ரி விற்பனைக்கு வந்திருக்கிறது. ஜப்பானில் விளைவிக்கப்படும் அரிய வகை கோடோகா ஸ்ட்ராபெர்ரிகள் குறைவான அளவில் விளைவிக்கப்பட்டு கைகளால் பறிக்கப்படுகின்றன. மற்ற ஸ்ட்ராபெர்ரிகளை விட இனிப்பு அதிகம். ஒரு பழத்தின் விலை ரூ.1,500. அழகான சிறிய பெட்டியில் வைத்துப் பரிசுப் பொருள் போல விற்பனை செய்யப்பட்டு வருகிறது. ஹாங்காங்கில் விற்பனைக்கு வந்த இந்த ஸ்ட்ராபெர்ரியைப் பார்த்து மக்கள் அதிர்ந்து போனார்கள். “காதலர் தினத்துக்காக அதிகம் செலவு செய்வோம் என்றாலும் ஒரே ஒரு ஸ்ட்ராபெர்ரிக்கு இவ்வளவு ரூபாய் என்பது ரொம்பவே அதிகம். இந்த விலை கொடுக்கும் அளவுக்கு அந்தப் பழத்தில் ஒன்றுமில்லை” என்கிறார் ஹாங்காங்கைச் சேர்ந்த யான் வாங்.

மக்களின் ஆர்வத்தை எப்படியெல்லாம் பயன்படுத்திக்கிறாங்க!

இந்தோனேஷியாவில் ஜிஜிவி திரையரங்குகள் பல்வேறு இடங்களில் இயங்கி வருகின்றன. இந்தத் திரையரங்குகளில் வெல்வெட் க்ளாஸ் பகுதி மிகவும் வசதியான இருக்கைகளைக் கொண்டது. இருக்கைகளை நீட்டி, மடக்கி, படுக்கை போல மாற்றிக்கொள்ளலாம். தலையணைகளும் இருப்பதால் வசதியாகப் படுத்துக்கொண்டோ, உட்கார்ந்துகொண்டோ திரைப்படத்தைப் பார்க்கமுடியும். சில ஆண்டுகளாக எந்தவிதப் பிரச்சினையும் இல்லாமல் இயங்கிவந்த இந்தத் திரையரங்கின் வெல்வெட் க்ளாஸ் பகுதியை சாதாரண இருக்கைகளாக மாற்றச் சொல்லியிருக்கிறார் பேலம்பாங் துணை மேயர். பொது இடத்தில் இதுபோன்ற இருக்கைகள் தவறான செயலுக்கு வழிவகுக்கின்றன என்று பொதுமக்களிடமிருந்து புகார்கள் வந்துள்ளதால், இவற்றை மாற்ற வேண்டும் என்று உத்தரவிட்டிருக்கிறார். “வெல்வெட் க்ளாஸ் ஜோடிகளுக்கு மட்டும் வழங்கப்படுவதில்லை. குடும்பத்துக்கே வழங்கப்படுகிறது. இங்கே வருகிறவர்கள் மிகவும் வசதியாக, குடும்பத்துடன் மகிழ்ச்சியாகத் திரைப்படம் பார்ப்பதாகச் சொல்லியிருக்கிறார்கள். நாங்கள் கண்காணிப்பு கேமராக்களை திரையரங்குக்குள் பொருத்தி கண்காணித்து வருகிறோம். தகாத செயல்கள் நடக்க வாய்ப்பில்லை. இதுவரை எங்களிடம் எந்தப் புகாரும் வந்ததில்லை. ஆனாலும் அரசு சொல்லும்போது மாற்றம் செய்வதைத் தவிர எங்களுக்கு வேறு வழியில்லை” என்கிறார் திரையரங்க உரிமையாளர்.

வசதிதான் முக்கியம் என்றால் வீட்டிலேயே பார்த்துக்கலாம்!