உலகின் மிக நீண்ட அரசியல் சாசனம் இந்திய அரசியலமைப்புச் சட்ட புத்தகம் என்று கேள்விப்பட்டிருப்பீர்கள். இதற்கு மேலும் சுவாரஸ்யமான பல தகவல்கள் இது குறித்து இருக்கிறது. தெரிந்து கொள்வோம் வாருங்கள்.
# மொத்தம் 22 பிரிவுகள், 12 அட்டவணைகள், 465 உட்பிரிவுகள் மற்றும் 1 லட்சத்து 46 ஆயிரம் சொற்கள் இந்திய அரசியலமைப்பு புத்தகத்தில் உள்ளன.
# நமது அரசியல் சாசனம் அச்சடிக்கப்பட்ட நூல் அல்ல. பிரேம் பெகாரி ரெய்ஜாடா என்ற கையெழுத்து கலைஞர்தான் தனது கைப்பட எழுதினார். 254 வகையான விதவிதமான பேனா நிப்புகளை பயன்படுத்தி எழுதி முடிக்க 6 மாதங்களுக்கு மேல் எடுத்துக் கொண்டார். சன்மானம் கோராமல் இதனை பிரேம் செய்தார். அதற்கு பதில் சாசனத்தின் ஒவ்வொரு பக்கத்திலும் தான் கையெழுத்திட நேருவிடம் ஒப்புதல் பெற்று செய்தார்.
# இந்த புத்தகத்தில் மவுரியா மற்றும் குப்தர் கால சித்திரங்கள், வேத காலம் முதல் நவீன காலம்வரை வரலாற்றை பிரதிபலிக்கும் ஓவியங்கள் வரையப்பட்டுள்ளன.
# பிரிட்டன், அமெரிக்கா, ரஷ்யா, கனடா, அயர்லாந்து உள்ளிட்ட நாடுகளின் அரசியலமைப்பு சட்டங்களை ஆராய்ச்சி செய்து அவற்றில் காணப்பட்ட மக்கள் நல அம்சங்களை உள்வாங்கிக் கொண்டு இந்திய அரசியலமைப்பை டாக்டர் அம்பேத்கர் வடித்தார்.
# 60 விதமான அரசியலமைப்பு சட்ட புத்தகங்களை இதற்காக டாக்டர் அம்பேத்கர் ஆராய்ச்சி செய்தார்.
# 11 மாதங்கள் 18 நாட்கள் சாசனத்தின் வரைவு தயாரிக்க டாக்டர் அம்பேத்கர் எடுத்துக் கொண்டார்.
# ஆங்கிலம், இந்தி இரண்டிலும் எழுதப்பட்ட இப்புத்தக்கம் டேராடூனில் அச்சடிக்கப்பட்டது.
# மேற்கு வங்க மாநிலத்தில் ரவிந்தரநாத் தாகூர் தொடங்கிய சாந்திநிகேத்தன் நுண்கலை கல்லூரியைச் சேர்ந்த கலைஞர்கள் இந்திய அரசியலமைப்பு புத்தகங்களின் பக்கங்களில் அழகிய ஓவியங்களை தீட்டினர். நந்தலால் போஸ், பெகார் ராம் மனோகர் சிங்கா அவர்களில் குறிப்பிடத்தகுந்தவர்கள் ஆவர்.
# பெண்களுக்கான உரிமைகள் சாசனத்தில் இடம்பெற அம்பேத்கர் மிகவும் போராடினார். இந்திய அரசியல் சாசனம் வகுக்கப்பட்ட பிறகுதான் இந்திய பெண்களுக்கு வாக்களிக்கும் உரிமை கிட்டியது.
# இந்திய அரசியல் சாசனத்துக்கு 3 அசல் பிரதிகள் உள்ளன. அவை ஹீலியம் வாயு நிரப்பப்பட்ட பெட்டிகளுக்குள் நாடாளுமன்றத்தில் பாதுகாப்பாக வைக்கப்பட்டுள்ளன.
தொகுப்பு: ம.சுசித்ரா