இமாச்சல் காங். துணைத் தலைவர் பாஜகவில் இணைந்தார்

புதுடெல்லி: இமாச்சலப் பிரதேச மாநிலத்தின் காங்கிரஸ் செயல் தலைவரும் மாநில முன்னாள் அமைச்சருமான ஹர்ஷ் மஹாஜன் பாஜகவில் சேர்ந்தார். முக்கியமான அரசியல் தலைவர் ஒருவர் நேற்று நண்பகல் 12 மணிக்கு பாஜகவில் சேரவுள்ளார் என அக்கட்சியின் ட்விட்டர் பக்கத்தில் பதிவிடப்பட்டிருந்தது. அவர் யாராக இருக்கும்? எந்த கட்சியை சேர்ந்தவர் என பல்வேறு தலைவர்களின் பெயர்களுடன் ஊகங்கள் வெளியாயின. இந்தப் பரபரப்புக்கிடையே இமாச்சல பிரதேச மாநில காங்கிரஸ் செயல் தலைவரும் மாநிலத்தின் முன்னாள் அமைச்சருமான ஹர்ஷ் மஹாஜன், நேற்று டெல்லியில் மத்திய அமைச்சர் பியூஷ் கோயல் முன்னிலையில் பாஜகவில் சேர்ந்தார்.

பாஜகவில் சேர்ந்த பின் ஹர்ஷ் மஹாஜன் அளித்த பேட்டியில், “நான் காங்கிரஸ் கட்சியில் 45 வருடமாக இருந்தேன். இன்று அந்த கட்சி தலைமை இல்லாமல் எந்த பாதையில் செல்கிறது என்று தெரியாமலும் உள்ளது. மேலும் காங்கிரஸ் தொலைநோக்கு பார்வை இல்லாமலும், களத்தில் இறங்கி பணி செய்ய யாரும் இல்லாத நிலையில் உள்ளது” என்று தெரிவித்தார். ஹர்ஷ் மஹாஜனின் மனைவி பிரதிபா சிங் இமாச்சல பிரதேச காங்கிரஸ் தலைவராகவும் இவர்களது மகன் விக்ரமாதித்யா சிங் காங்கிரஸ் எம்எல்ஏ.வாகவும் உள்ளனர். இந்த ஆண்டு இறுதியில் இமாச்சல பிரதேச சட்டப்பேரவைக்கு தேர்தல் நடக்கவுள்ள நிலையில் ஹர்ஷ் மஹாஜன் பாஜகவில் இணைந் திருப்பது குறிப்பிடத்தக்கது.