Published : 04 Jun 2021 12:51 pm

Updated : 04 Jun 2021 12:51 pm

 

Published : 04 Jun 2021 12:51 PM
Last Updated : 04 Jun 2021 12:51 PM

10-ம் வகுப்புக்குப் பொதுத் தேர்வு; 12-ம் வகுப்புத் தேர்வு ரத்து: கர்நாடகா

karnataka-to-hold-sslc-exams-in-july-promotes-second-puc-students

பெங்களூரு

ஜூலை மாதத்தில் 10-ம் வகுப்புத் தேர்வுகள் நடத்தப்பட உள்ளதாகவும், 12-ம் வகுப்பு மாணவர்களுக்குத் தேர்ச்சி வழங்கப்படுவதாகவும் கர்நாடக அரசு அறிவித்துள்ளது.

கர்நாடகாவில் கரோனா வைரஸ் தொற்று காரணமாக கடந்த கல்வி ஆண்டில் 1 முதல் 5-ம் வகுப்பு வரையிலான மாணவர்களுக்குப் பள்ளிகள் திறக்கப்படவில்லை. 6 முதல் 9-ம் வகுப்பு வரையிலான மாணவர்களுக்குக் கடந்த ஜனவரியில் பள்ளிகள் திறக்கப்பட்டன. நெருக்கடி காலத்தில் ஆன்லைனிலும் நேரடியாகவும் கல்வி போதிப்பதும், கற்பதும் பெரும் சவாலாக இருந்தது. இதைக் கருத்தில் கொண்டும் கரோனா 2-வது அலை காரணமாகவும் 1 முதல் 9-ம் வகுப்பு வரையிலான மாணவர்கள் அனைவருக்கும் தேர்வு இன்றித் தேர்ச்சி அளிக்கப்பட்டது.


இதற்கிடையே நாட்டில் அதிகரித்து வரும் கரோனா வைரஸ் பரவல் காரணமாக சிபிஎஸ்இ 12-ம் வகுப்புத் தேர்வுகள் அனைத்தும் ரத்து செய்யப்படுவதாக மத்திய அரசு அண்மையில் அறிவித்தது. மத்தியப் பிரதேசம், உத்தரப் பிரதேசம், ராஜஸ்தான், உத்தராகண்ட், குஜராத், கோவா, மகாராஷ்டிரா உள்ளிட்ட மாநிலங்களும் பொதுத் தேர்வுகளை ரத்து செய்தன.

இந்நிலையில் ஜூலை மாதத்தில் 10-ம் வகுப்புத் தேர்வுகள் நடத்தப்பட உள்ளதாகவும் 12-ம் வகுப்பு மாணவர்களுக்குத் தேர்ச்சி வழங்கப்படுவதாகவும் கர்நாடக அரசு அறிவித்துள்ளது.

இதுகுறித்துக் கர்நாடகப் பள்ளிக் கல்வித்துறை அமைச்சர் சுரேஷ்குமார் செய்தியாளர்களிடம் இன்று பேசும்போது, ''கரோனா தீவிரமடைந்ததை அடுத்து 12-ம் வகுப்புப் பொதுத் தேர்வுகள் ரத்து செய்யப்பட்டுள்ளன. 11-ம் வகுப்புத் தேர்வில் அவர்களின் செயல்திறனைக் கணக்கில் கொண்டு மதிப்பீடு செய்யப்படுவர். எனினும் தங்களின் மதிப்பீட்டில் மகிழ்ச்சி அடையாத மாணவர்கள், சூழல் ஏற்படும்போது வைக்கப்படும் தேர்வை எழுதலாம்.

அரசு 10-ம் வகுப்பு மாணவர்களுக்கு பொதுத் தேர்வுகளை நடத்த முடிவெடுத்துள்ளது. ஜூலை 3-வது வாரத்தில் தேர்வுகள் தொடங்கி நடைபெறும். கேள்விகள் எளிமையாகவும் நேரடியாகவும் இருக்கும். குழப்பும் வகையில் இருக்காது. கோவிட் தொற்றால் பாதிக்கப்பட்ட மாணவர்களுக்கு மறு தேர்வுகளும் பின்னர் நடத்தப்படும்'' என்று அமைச்சர் சுரேஷ்குமார் தெரிவித்துள்ளார்.

தவறவிடாதீர்!



ஜூலை10-ம் வகுப்புபொதுத் தேர்வுகள்12-ம் வகுப்புக்குத் தேர்ச்சிகர்நாடகா அறிவிப்புஅமைச்சர் சுரேஷ்குமார்தொற்றுப் பரவல்Second PUC StudentsSSLC Examsபொதுத் தேர்வு

Sign up to receive our newsletter in your inbox every day!

More From This Category

More From this Author

x