Published : 05 May 2021 02:37 PM
Last Updated : 05 May 2021 02:37 PM

கரோனா; கர்நாடகாவில் 12-ம் வகுப்புப் பொதுத் தேர்வுகள் ஒத்திவைப்பு: 11-ம் வகுப்புக்குத் தேர்ச்சி

கர்நாடகாவில் கரோனா தீவிரமடைந்ததை அடுத்து 12-ம் வகுப்புப் பொதுத் தேர்வுகள் ஒத்திவைக்கப்பட்டுள்ளன. 11-ம் வகுப்பு மாணவர்கள் தேர்வுகள் இன்றித் தேர்ச்சி செய்யப்படுவர் என்று அறிவிக்கப்பட்டுள்ளது.

நாட்டில் கரோனா 2-வது அலை வேகமாகப் பரவி வருகிறது. தினந்தோறும் 3 லட்சத்துக்கும் மேற்பட்டோர் தொற்றால் பாதிக்கப்பட்டு வருகின்றனர். அதிகரித்து வரும் கரோனா வைரஸ் பரவல் காரணமாக சிபிஎஸ்இ 12-ம் வகுப்புத் தேர்வுகள் அனைத்தும் தேதி குறிப்பிடாமல் ஒத்திவைக்கப்படுவதாகவும், 10-ம் வகுப்புத் தேர்வுகள் ரத்து செய்யப்படுவதாகவும் மத்திய அரசு அண்மையில் அறிவித்தது. மத்தியப் பிரதேசம், ராஜஸ்தான், இமாச்சலப் பிரதேசம், மகாராஷ்டிரா, மேற்கு வங்கம் உள்ளிட்ட மாநிலங்களும் பொதுத் தேர்வுகளை ஒத்திவைத்தன.

கர்நாடகாவில் கரோனா வைரஸ் தொற்று காரணமாக இந்தக் கல்வி ஆண்டில் 1 முதல் 5-ம் வகுப்பு வரையிலான மாணவர்களுக்குப் பள்ளிகள் திறக்கப்படவில்லை. 6 முதல் 9-ம் வகுப்பு வரையிலான மாணவர்களுக்கு கடந்த ஜனவரியில் பள்ளிகள் திறக்கப்பட்டன. நெருக்கடி காலத்தில் ஆன்லைனிலும் நேரடியாகவும் கல்வி போதிப்பதும், கற்பதும் பெரும் சவாலாக இருந்தது. இதைக் கருத்தில் கொண்டும் கரோனா 2-வது அலை காரணமாகவும் 1 முதல் 9-ம் வகுப்பு வரையிலான மாணவர்கள் அனைவருக்கும் தேர்வு இன்றித் தேர்ச்சி அளிக்கப்பட்டது.

அதைத் தொடர்ந்து 12-ம் வகுப்புக்கான செய்முறைத் தேர்வுகள் ஒத்திவைக்கப்பட்ட நிலையில், தற்போது பொதுத் தேர்வுகளும் ஒத்தி வைக்கப்பட்டுள்ளன.

இதுகுறித்துக் கர்நாடகப் பள்ளிக் கல்வித்துறை அமைச்சர் சுரேஷ்குமார் செய்தியாளர்களிடம் பேசும்போது, ''கரோனா தீவிரமடைந்ததை அடுத்து 12-ம் வகுப்புப் பொதுத் தேர்வுகள் ஒத்திவைக்கப்பட்டுள்ளன. 11-ம் வகுப்பு மாணவர்கள் தேர்வுகள் இன்றித் தேர்ச்சி செய்யப்படுவர். கரோனா பரவல் அதிகரித்ததை அடுத்து, ஆசிரியர்கள் அனைவரும் இனி வீட்டில் இருந்தே பணியாற்றுவர்'' என்று தெரிவித்துள்ளார்.

அண்டை மாநிலமான ஆந்திரப் பிரதேசத்தில், 10 மற்றும் 12-ம் வகுப்பு (இண்டர்) பொதுத் தேர்வுகள் திட்டமிட்ட தேதியில் நடைபெறும் என்று தெரிவிக்கப்பட்டுள்ளது குறிப்பிடத்தக்கது.

FOLLOW US

தவறவிடாதீர்!

Sign up to receive our newsletter in your inbox every day!

WRITE A COMMENT
 
x