மாநகராட்சி பள்ளி மாணவர்களுக்கான வாழ்க்கை வழிகாட்டி கையேடு- ஆணையர் கோ.பிரகாஷ் வெளியிட்டார்

சென்னை மாநகராட்சி வெளியிட்ட செய்திக்குறிப்பில் கூறியிருப்பதாவது:

சென்னை மாநகராட்சியும், சென்னை ரோட்டரி கிளப் (கிழக்கு) ஆகியவை இணைந்து ‘வாழ்க்கை வழிகாட்டி’ என்ற நிகழ்ச்சி ரிப்பன் மாளிகை வளாகத்தில் நேற்று நடைபெற்றது. இதில் மாநகராட்சி ஆணையர் கோ.பிரகாஷ் பங்கேற்று, மாநகராட்சி பள்ளியில் 12-ம் வகுப்பு பயிலும் மாணவ, மாணவிகளுக்கு உதவும் வகையில் பல்வேறு ஆலோசனைகள் அடங்கிய, இந்தியக் கல்வி அறிவுத் திட்டக் குழுவால் தயாரிக்கப்பட்ட வாழ்க்கை வழிகாட்டி கையேட்டை வெளியிட்டார்.

பின்னர், மாணவ, மாணவியர்கள் 12-ம் வகுப்புக்கு பிறகு எந்த உயர் கல்வியை தேர்ந்தெடுப்பது, அதன் வாயிலாக எப்படி வாழ்க்கையை செம்மையாக அமைத்து கொள்வது என்பதை கையேடு மூலம் அறிந்துகொள்ளலாம் என எடுத்துரைக்கப்பட்டது.

இந்த விழிப்புணர்வு நிகழ்ச்சியில் 32 மாநகராட்சி மேல்நிலைப் பள்ளிகளில் இருந்து 1000-க்கும் மேற்பட்ட அறிவியல், கலைப்பிரிவு மற்றும் வணிகவியல் சார்ந்த மாணவ, மாணவியர் பங்கு பெற்றனர். இந்நிகழ்ச்சியில் கல்வி அலுவலர் பாரதிதாசன் மற்றும் உதவி கல்வி அலுவலர்கள், ரோட்டரி கிளப் பிரதிநிதிகள் உட்பட பலர் கலந்து கொண்டனர்.

இவ்வாறு செய்திக்குறிப்பில் கூறப்பட்டுள்ளது.