5, 8-ம் வகுப்புகளுக்கு பொதுத்தேர்வு அட்டவணை வெளியீடு: முழு விவரம்

5, 8-ம் வகுப்பு மாணவர்களுக்கான பொதுத்தேர்வு அட்டவணையை அரசுத் தேர்வுகள் இயக்ககம் வெளியிட்டுள்ளது.

அனைத்துப் பள்ளிகளிலும் 5 மற்றும் 8-ம் வகுப்பு மாணவர்களுக்கு 2019 - 2020 ஆம் கல்வியாண்டில் இருந்து பொதுத் தேர்வு நடத்த வேண்டும் என்று பள்ளிக் கல்வித்துறை அண்மையில் ஆணையிட்டது. இதைத் தொடர்ந்து அரசுத் தேர்வுகள் இயக்ககம் தற்போது பொதுத்தேர்வு அட்டவணையை வெளியிட்டுள்ளது.

இதன்படி 8-ம் வகுப்பு மாணவர்களுக்கு, பொதுத் தேர்வு மார்ச் 30-ல் தொடங்கி ஏப்ரல் 17-ம் தேதி முடிவடைகிறது. 5-ம் வகுப்பு மாணவர்களுக்கு ஏப்ரல் 15-ல் தொடங்கும் தேர்வு, அதே மாதம் 20-ம் தேதி முடிகிறது.

இரண்டு பொதுத் தேர்வுகளின்போதும் தேர்வெழுதும் மாணவர்கள் காலை 10 மணிக்குத் தேர்வு அறைக்கு வரவேண்டும். கேள்வித் தாளைப் படிக்க 10 நிமிடங்கள் வழங்கப்படும். தேர்வு பதிவெண் உள்ளிட்ட விவரங்களைப் பதிவு செய்ய 5 நிமிடங்கள் அளிக்கப்படும். அதைத் தொடர்ந்து 10.15 மணியில் இருந்து 12.15 மணி வரை, 2 மணி நேரம் தேர்வு நடைபெறும்.

எப்போது என்ன தேர்வு?

8-ம் வகுப்புக்கு:

தமிழ்- மார்ச் 30
ஆங்கிலம் - ஏப்ரல் 2
கணிதம் - ஏப்ரல் 8
அறிவியல் - ஏப்ரல் 15
சமூக அறிவியல் - ஏப்ரல் 17

5-ம் வகுப்புக்கு:

தமிழ்- ஏப்ரல் 15
ஆங்கிலம் - ஏப்ரல் 17
கணிதம் - ஏப்ரல் 20

5 மற்றும் 8-ம் வகுப்புகளுக்கு முதல் இரண்டு பருவங்களுக்கான புத்தகங்கள் வழங்கப்பட்டுள்ளன. மூன்றாவது பருவத்துக்கான புத்தகங்கள் இன்னும் வழங்காத நிலையில் பொதுத் தேர்வு நடைபெறும் என்று அறிவிக்கப்பட்டுள்ளது.

5, 8-ம் வகுப்புக்கு எழுத்துத்தேர்வு 60 மதிப்பெண்களுக்கு நடைபெறும். மீதமுள்ள 40 மதிப்பெண்கள் கல்வி தொடர்பான வளரறி மதிப்பீடு செயல்பாடுகளுக்கு வழங்கப்படும்.

5-ம் வகுப்புக்கு தமிழ், ஆங்கிலம், கணிதம் தொடர்பான அடிப்படைக் கருத்துகள், பயிற்சிகள் மற்றும் கற்றல் விளைவுகளைச் சோதிக்கும் வகையில் எழுத்துத் தேர்வு நடைபெறும்.

8-ம் வகுப்புக்கு அனைத்து பாடங்களுக்கும் முப்பருவ அடிப்படைக் கருத்துகள் மற்றும் பயிற்சிகளை சோதித்தறியும் வகையில் நடைபெறும். எனினும் பொதுத்தேர்வுகள் எளிதாகவே இருக்கும் என்று பள்ளிக் கல்வித்துறை சார்பில் தெரிவிக்கப்பட்டுள்ளது.